Aalisarneq
Uummannami aalisariutit aalisarsinnaanngorput
Aqutsiveqarfimmi Uummannami aalisariutit meterinik arfinilinnik anginerit ippassaq ataasinngornermit qaleralinniarsinnaalerput, ukiup naanissaanut katillugit 379 tonsinik qaleralittassaqarlutik
Aalisarnermut, Piniarnermut Nunalerinermullu Naalakkersuisoqarfiup aalisariutit qaleralittassaat juunimi 379 tonsinik ilavai.
Ajoraluartumilli Aalisarnermut, Piniarnermut Nunalerinermullu Naalakkersuisoqarfiup aalisariutinut qaleralittassat ilassutigineqartut pisassat nalunaarsorneqarfiannut ilanngutinngitsoorsimavai.
- Ajuusaarnaqisumik kukkuneq Aalisarnermut, Piniarnermut Nunalerinermullu Naalakkersuisoqarfimmi qaleralittassiissutigineqartut kukkunersiornerini qaleralittarineqartullu nalunaarusiornerini sapaatip akunerani kingullermi paasineqarpoq, Namminersorlutik Oqartussat allappoq.
Aqutsiveqarfimmi Uummannami aalisariutit ukioq manna qaleralittassaat 2.389 tonsiunatik 2.768 tonsiupput. Qaleralittarineqartartut nalunaarsuiffianni allassimagaluarpoq qaleralittassaat 2.389 tonsiusut.
- Aalisarnermut, Piniarnermut Nunalerinermullu Naalakkersuisoqarfik kukkunermut ajuusaartorujussuuvoq ilungersunartumillu kukkusimaneq isigalugu, Namminersorlutik Oqartussanit oqaatigineqarpoq.
Aalisariutit meterinik arfinilinnik anginerit 37-it Uummannameersutut ilisarnaateqartut. Taakkunanit 29-t suli qaleralittassaqarput, arfineq pingasut ukioq manna pisassatik tamakkereersimallugit.
Aalisariutaatillit ukioq manna pisassaminnik tamakkeereersimasut qinnuteqarnermikkut novembarip 15-iata kingorna qaleralinnialersinnaapput. Ullup pineqartup kingorna aalisalernissamut qinnuteqaatsik nassiukkunikku.
Novembarip 15-iata kingorna qaleralinniarsinnaanermut nuussinissamillu Aalisarnermut, Piniarnermut Nunalerinermullu Naalakkersuisoqarfimmut, aalisalernissaq kingusinnerpaamik sapaatip akunneri marluk sioqqullugu qinnuteqartoqarsinnaavoq.
Qinnuteqaammi allassimasoqassaaq sumi qaleralinniarnissaq kissaatigineqartoq, aamma allassimassalluni qanoq amerlatigisunik ukioq manna qaleralittarineqartussatut kissaatigineqarnersut, aappaagumulluunniit nuunneqartussat pillugit aamma allassimasoqassalluni.
Aalisarnermut, Piniarnermut Nunalerinermullu Naalakkersuisoqarfik oktobarip 14-ianni 2014 nalunaarpoq aqutsiveqarfik Uummannami aalisariutit meterinik arfinilinnik anginerit ukioq manna pisassatik tamakkereeraat.