Uummalluttut Sanami pilertornerusumik nakorsarneqartalissapput

Qarasaasiakkut sullississut nutaaq ulytralyd atorlugu misissukkat assinginik Dronning Ingridip Naparsimmavissuata Rigshospitalillu akornanni nassitsisinnaalerneq uummammikkut nappaatillit siunissami iluaqutigilissavaat.

Taamaaliorsinnaalernikkut pilertornerusumik nappaat suussusersineqarsinnaanngussaaq tamatumalu malitsigisaanik pilertornerusumik nakorsaasoqarsinnaanngussalluni, Namminersorlutik Oqartussat allapput.

Pitsanngoriaat annertooq
Siornatigut assinik nassitsiniarneq sivisunerusarmat assillu ersernerlupallaartarmata, Qallunaat Nunaanni nakorsaanernit uummatikkut nappaatinik immikkut ilisimasalinnit sukumiisumik misissorneqarsinnaasanngimmata, nappaatit suussusaasa pilatsinnissamullu periarfissat oqallisiginissaat naliliiviginiarnerallu ajornakusoornerusoq, Dronning Ingridip Napparsimmavissuani nakorsartittunut immikkoortortaqarfimmi nakorsaaneq, Uka Wilhjelm Geisler, oqaluttuarpoq.

Taamaattumik taassuma nakorsianik nakorsaaneq maanna pitsanngoriangaatsiarmat nuannaarutigaa.

Ukiumut 75-it missaaniittut
- Ultralyd atorlugu uummatisiukkatta ilaat pilertortumik akissutisissarsivigisinnaajumallugit naliliivigitissinnaajumallugillu nakorsaanernik uummatikkut nappaatinik immikkut ilisimasalinnik allanik attaveqateqarsinnaanerup pitsaanerpaanissaa sulinitsinnut nakorsartinnissamullu annertuumik pingaaruteqarpoq, Uka Wilhjelm Geisler nassuiaavoq.

Periarfissami matumani qarasaasialerinermi immikkoortortaqarfik Rigshospitalimilu uummammikkut nappaatilinnut immikkoortortaqarfik suleqatigalugit pilersinneqartumi siunissami meeqqat inersimasullu uummalluuteqartut eqqarsaatigineqartut, Namminersorlutik Oqartussat ilsimatitsipput.

Dronning Ingridip Napparsimmavissuani ukiut tamaasa uummalluutillit 75-it missaanniittut periarfissaq nutaaq taanna iluaqutigilersussaassavaat.