Nuuk
Uumasut peqqarniitsumik toqunneqartartut nunamullu igiinnarneqartartut
Kommuneqarfik Sermersuup aarlerisaarutigaa, uumasut toqungasut perlerornermik tuniluunneq annertunerulersissiinaagaa
Kommuneqarfik Sermersooq Nuummi innuttaasunit qimminik qitsunnillu pinngortitami toqunneqarlutik qimaannarneqarsimasunik naammattuuisimasunit qaammatit tamaasa arlaleriarluni saaffigineqartarpoq.
Uumasut ilaat peqqarniitsumik toqunneqartarput qanoq anniartiginissaat naalliutsiginissaallu eqqarsaatiginagit, tamanna immini inerteqqutaaginnarani aamma ileqqorissaarnerunngilluinnarpoq.
Nalinginnaajartuinnarnera alianartoq
- Ajoraluartumik qimmit toqunneqarsimasut arlallit naammattoorneqartarput nunaannarmi toqungasut piginnitsiminnit qimaannarneqarsimasunik. Tamassuma nalinginnaajartuinnarnera alianartuuvoq. Uumasup toqunneqarnissaanik kissaateqartoqarpat taava uumasup sapinngisamik pitsaanerpaamik annernanngitsumillu toqunneqarnissaa siullertut iliuuserineqassaaq, taassuma saniatigut uumasumik toqungasumik maanngaannaq qimatsinnginnissamik pisussaaffeqarpugut, Kommuneqarfik Sermersuumi uumasunik peqqissaasoq veterinærsygeplejerske Madeleine Lind oqarpoq.
Nappaatinik siammarterineq
Uumasumik toqungasumik nassaartut akuttunngitsumik meeraasarnerat pissutigalugu saniatigullu nappaatinik soorlu perlerornermik tuniluuttumik aallaaveqarsinnaaneri eqqarsaatigineqartariaqarput.
Assersuutigalugu mittarfiup eqqaani terianniarpassuaqarpoq taamaattumik takorloorneqarsinnaavoq illup iluani uumasuutigisimasat toqungasut aamma teriannissat akornanni nappaatinik tunillaassuuttoqarsinnaanera taassumallu kinguneranik uumasut perlerornermik tunillatsissimasut Nuummi kikkunnut tamanut aarlerinaataasumik amerlillutik.
Kommuni attavigiuk
Innuttaasut uumasumik toqungasumik naammattuuisut piaarnnerpaamik kommunimut attaveqassapput imaluunniit uumasut illersorneqarnissaannut inatsimmik unioqqutitsisoqarsimaneranut takussutissaqarpat politiinut attaveqassapput uumasoq tamaanngaanniit peerneqarniassammat.
Illup iluani uumasuutigisap toqunneqarnissaa kissaatigigaanni taassuminnga toqutsinerup pitsaanerpaamik aamma inatsisit naapertorlugit ingerlanneqarnissaa qulakkeertariaqarpoq.
Qimitsineq inerteqqutaavoq
Qimmiutigisaq imaluunniit qitsuutigisaq nammineerluni aallaagaanni politiinit malittareqqusat naapertorlugit toqutsineq ingerlanneqassaaq taava uumasoq toqungasoq puumut ikillugu matoqqatillugu ikuallaavimmut tunniunneqassaaq.
Uumasumik toqutsineq qimitsinikkut, ipisitsinikkut imaluunniit nivinngaanikkut ingerlanneqartussaanngilaq aamma inerteqqutaavoq. Uumasumik aallartoorfiginnikkaanni uumasup erngerluni nassaarineqarluni toqunneqarnissaa qulakkeerneqassaaq imaluunniit toqunneqarnissaa siunertaralugu politiit attavigineqassapput.
Atuaruk: Qimmiutillit naalliutsitsisimasutut akiliisitaapput