endelig
Uumasut nakorsaat nutaaq Nuummi najugaqarusuttoq
Uumasuutinut ukioq manna juullimi tunissut: Uumasut nakorsassaannik tikittoqangajalersinnaasoq
Nuummi uumasuutit inuttaallu immaqa juullisiorluartussanngorput.
Tassami uumasut nakorsaqarnikkut – kiisami! – ataavartumik aaqqiissuteqartoqarnissaa ilimanarsivoq.
Periarfissat marluusinnaapput: Uumasut nakorsaannik qallunaamik illoqarfimmut nuuttoqarsinnaavoq, imaluunniit uumasuutit qallunaat suliffeqarfiutaannit nutaamit, Grønlands Dyrlægeservicemit, qaammatit allortarlugit ullualunni illoqarfimmi sullissiartortartussamit sullinneqalersinnaallutik.
- Aaqqiissutissaq siulleq soqutignerpaagunarparput, taamaalilluta maaniittuaannartussamik uumasunut nakorsaqalissagatta. Uumasummi nakorsaat angalasartut sullissilissappata pisut pinartut isumagineqarnissaannut periarfissaqarnavianngilagut. Qimmeq nissuminik napisoorsimasoq sapaatip-akunnerini arlalinni utaqqisinneqarsinnaanngilaq, peqatigiiffimmi nammineq kajumissuseq tunngavigalugu ingerlanneqartumi, Nuummi Uumasuni, uumasut nakorsaqarnikkut pissutsit atoruminaatsut aaqqiiviginiarlugit ilungersorluni sulissuteqartumi, siulersuisunut ilaasortaq, Tom Amtoft, oqarpoq.
Nuummi susoqarnersoq Nuuk Ugeavisimi oqaluttuanik amerlanernik atuarsinnaavutit. Aviisi akeqanngitsumik uani pisiariguk: