Kangerlussuaq

Uumasut nakorsaat: Kangerlussuarmi perlerortoqarsorinarpoq

Qimmit tamarmik akiuussutimmik kapineqarsimanersut Qeqqata Kommuniani misissorneqaleruttorpoq. Teriannissat aamma maluginiarneqarput

Sanne Eline Wennerberg - assi toqqorsivimmit

Kangerlussuarmi politiit ilisimatitsipput teriannianik marlunnik eqqumiitsunik pissusilersortunik sapaatip akunnerani kingullermi toqutsisimallutik.

Terianniap aappaa Pilersuisup pisiniarfiata eqqaanut, inuit pisiniarfilialeruttorfiisa nalaanni, arfininngormat ullaap tungaani qanillattorsimavoq. Aappaa nunaqarfiup qeqqani biilip assakaasuanik kimmaaleruttortoq biilimit aportippoq, kinguninngua toqunneqarluni.

- Inunnut qunutunngilluinnarnerata pissusissamisullu pissusilersunnginnerata, soorlu biilip assakaasuanik kimmaaniarnerata, takutippaa perlerortuusoq, uumasut nakorsaat Sanne Eline Wennerberg tusagassiutinut nalunaarummi oqarpoq.

Kangerlussuarmi innuttaasut kajumissaarneqarput teriannianut qaninngortassanngitsut. Nunaqarfimmut teriannianik qaninngoortoqarpat politiit kommunilluunniit qimmilerisua tamatuminnga ilisimatinneqassapput.

Akiuussutissaq eqqaamaneqarli
- Taamaakkaluartoq qimmillit kaammattorusuppakka qimmitik ungaluukkamiitittuassagaat, qimmillu ukiut pingasut sinnerlugit perlerornermut akiuussummik kapitinneqarsimasuunnginnissaannik qulakkeerinnissasut, Sanne Eline Wennerberg erseqqissaavoq.

Terianniat perlerorsinnaaneri pillugit politiit Kangerlussuarmi innuttaasunut ajunngilluinnartumik paasititsiniaasimapput.

Uumasut nakorsaata ilanngullugu oqaluttuaraa Qeqqata Kommuniata qimmeqarneq pitsaasumik qularnaatsumillu isumagilluaraa, qimmillu tamaasa akiuussutissamik kapitinneqarnissaat pillugit maannakkut aamma misissoraa, kommunimilu qimmilerisoq teriannianut alaatsinaattoq.

Sanne Eline Wennerberg ilisimatitsivoq terianniat niaqui nassiunneqassasut, tamatumuuna terianniat perlerornersut qularnaarneqassalluni.

Kangerlussuarmi qimmit ungaluukkamiitinneqartarput.

Powered by Labrador CMS