Nunaoil A/S

Uuliasiornissanut suliat unikaallatsinneqarput

Kalaallit Nunaanni uuliasiornissarpassuarnik takorluukkat eqquutsinneqanngillat, Nunaoil A/S-imilu sulisunut tamanna kinguneqarpoq, taanna 2009-mili Namminersorlutik Oqartussat ikummatissanik akuersissutinut peqataaneranut suliaqartarsimavoq.

Stine Bosse

Ingerlatseqatigiiffik matuneqanngitsoq Aatsitassanut naalakkersuisoq, Múte Bourup Egede tusagassiuutinut nalunaarummi ilisimatitsivoq. Namminersorlutik Oqartussat taama sakkortutigisumik iliuuseqarnianngillat.

Akisussaassusilimmik naleqqussarneq
- Ingerlatseqatigiiffik ullumikkut pisarnermisut suliaqassaaq, annikinnerusumilli naleqqussarneqartumik ilusilimmik suliaqassalluni. Suliffeqarfimmi piginnittutut akisussaaffeqartutut allatuulli, aaqqissuussaaneq naleqqussarparput, Múte Bourup Egede ilisimatitsivoq.

Siulersuisut ikilisinneqarnissaat pilersaarutaavoq, siunissamilu ilaasortat tallimaajunnaarlutik pingasuinnanngussapput.

Ingerlatseqatigiiffiup siulersuisuini siulittaasoq, Stine Bosse, sulisut qanoq amerlatigisut eqqorneqarnissaat suli aalajangiiffigineqanngitsoq, Sermitsiaq.AG-mut ilisimatitsivoq. Sulisut ullumikkut sisamaapput. Qaammatini tulliuttuni tamanna paasinarsissaaq, tassani ingerlatseqatigiiffiup allanngortinneqarneranut pilersaarut suliarineqassaaq.

Ukiumut millionimik aningaasartuutilik
Ingerlatseqatigiiffik ukiumut aningaasanut inatsimmit millionimik immikkoortitsiffiusarpoq.

- Aningaasat amerlassusiat aningaasanut inatsimmut sunniisimavoq, ingerlatseqatigiiffimmi ikilisaanissaq pillugu Stina Bosse nassuiaavoq. Ingerlatseqatigiiffik aningaasartuutaannaanngitsoq aamma erseqqissarpaa. Ingerlatseqatigiiffimmi siusinnerusukkut sajuppillatsitsinernik tunisaqartarnikkut annertuumik kaaviiaartitaqartarsimanera paasissutissiissutigalugu, taanna paasissutissiivoq.

Nunarsuarmi uuliasiornerup malunnaatilimmik allanngoriarsimanera uuliallu akiisa appariartuinnarnerat ingerlatseqatigiiffiup annikillisarneqarnerannik nassuiaatissartaqarpoq.

Atituumik isumaqatigiittut

- Tamatuma ilaatigut malitsigisaanik Kalaallit Nunaanni uuliasiorluni misissuinissamut soqutiginninneq annikillivoq. Taamaattumik ullumikkut uuliasiorluni misissuinermi ingerlatat, ukiualuit matuma siorna naatsorsuutigineqartunit aammalu neriuutigineqartunit annikinnerupput. Uuliasiorluni misissuinermi ingerlatat annikillinerisa kingunerisaanik piginnittut aamma siulersuisut atituumik isumaqatigiillutik, Nunaoil A/S-imi ingerlatat annikillisinneqarnissaat aalajangiuppaat, tusagassiuutinut nalunaarummi taama allaqqasoqarpoq.

Powered by Labrador CMS