uulia

Uuliasioqatigiiffiit Nunatta imartaani qillererusukkunnaarnerat ima pissuteqarpoq

Kalaallit Nunaanni uuliasiortoqarnissaanik takorluugaq ungasilliartorpoq. Uuliamik qalluineq akisunerata pissutigisaanik aningaasaliiniat uniinnarput

Kalaallit Nunaata aatsitassarsiornikkut tunisassiornissaanik takorluugaqarnera ungasilliartorpoq.

Baffinip kangerliumarngani uuliasiornissamut misileraanissamut akuersissuteqartut sisamaasunit pingasut tunuartut AG pingasunngornermi saqqummersumi allappoq. Danskit uuliasioqatigiiffiat Dong, franskit uuliasioqatigiiffiat GDF Suez kiisalu norskit uuliasioqatigiiffiat uuliaqarneranik misissuinissartik taamaatikkaat aviisimi allaaserineqarpoq.

GDF Suezip Kalaallit Nunaanni immikkoortortaqarfianit tunuarneq ima oqaaseqarfigineqarpoq:

- Imaassinnaasoq siunissami soqutiginneqqilersugut. Maannakkulli pissutsit qiviaraanni Kalaallit Nunaannilu pissutsit qiviaraanni soqutiginninnerput annikippoq. Kalaallit Nunaanni angallanniarneq ajornakusoorpoq. Avatangiisinut tunngatillugu piumasaqaatit annertupput, sila aamma suliniarnermut ajornakusoortitsisinnaasarpoq. Taamaattumik aamma sanaartorsinnaaneq ajornakusoorsinnaavoq, GDF Suezip Kalaallit Nunaata immikkoortortaqarfiani pisortaq Johannes Finborud Politikenimut oqarpoq.

Aatsitassarsiornermik Naalakkersuisoqarfimmit nutaarsiassaq pitsaasuunngitsoq ilisimaarineqarpoq. Kalaallit Nunaannili siunissami uuliasiortoqalernissaa suli neriuutigineqarpoq.

- Kalaallit Nunaat uuliasiornerup tungaatigut nutaajuvoq. Kalaallit Nunaat angisoorujussuuvoq, taamaattumik geologit uuliamik nassaassaqannginneranik oqaraluartut sumiiffinni allani periarfissarpassuaqarpoq, Naalakkersuisoqarfimmi pisortaq Jørgen T. Hammeken-Holm oqarpoq.

Powered by Labrador CMS