uulia
Uuliasioqatigiiffiit Kalaallit Nunaanni uuliasiornissaq taamaatiinnarpaat
Uuliasiorfiit pingasut Baffinip kangerliumarngani uuliasiornissamik takorluugaqarsimasut aalajangerput suliatik unitsiinnarniarlugit. Suliffeqarfiit amerlanerusut taamatut aalajangernissaat ernumagalugu uuliasioqatigiiffiit Namminersorlutik Oqartussanit sivisunerusumik piffissalerneqarput
Uuliasiornikkut siunissami aningaasarsiorsinnaaneq takorlooruminaassiartuinnarpoq.
Uuliap akiata appariartuinnavilluni maanna 47 dollarit ataallugit akeqalernera ilutigalugu, Issittumi uuliasiornissamut soqutiginninneq tamanna ingiaqatigalugu appariartorpoq. Ilisimatuunit naatsorsorneqarpoq Issittumi uuliasiortoqassappat uulia 80 dollarit missaannik akeqassappat aatsaat imminut akilersinnaasoq.
Baffinip kangerliumarngani uuliasiornissamut misileraanissamut akuersissuteqartut sisamaasunit pingasut tunuarput, tassami danskit uuliasioqatigiiffiat Dong, franskit uuliasioqatigiiffiat GDF Suez kiisalu norskit uuliasioqatigiiffiat uuliaqarneranik misissuinissartik taamaatimmassuk.
Uuliasioqatigiiffiit pingasut tunuareersullu Namminersorlutik Oqartussat uuliasioqatigiiffiit sivisunerusumik piffissalerpaat. Uuliasioqatigiiffiit Baffinip kangerliumarngani uuliasiornissamut misileraanermut Naalakkersuisunit qanoq pinissaannik nalilersuinissamut ukiuni marlunni periarfissinneqarput.
- Massakkut uuliasiortut sunik aporfeqarnerannik oqaloqatigileruttorpavut. Taakkunanngalu arlallit tunuarnissamik eqqarsaatersuuteqarput, uatsinnullu sunik allanik periarfissaqarneranik paasiniaallutik saaffiginnipput, Jørgen T. Hammeken-Holm oqarpoq.
Atuagagdliutini pisiarineqarsinnaalersumi aamma Charlie Hebdomi siornatigut saqqaritinneqarsimasoq aviisimi saqqummiunneqarpoq. Charlie Hebdomi titartaasartoq Bob Katzenelsonip apersorneqarnera AG-mi ilaavoq kiisalu aviisimi pingaarnertut allaatigisami killilersugaanngitsumik oqalussinnaatitaaneq pillugu aamma allattoqarluni. Aviisi uani pisiarineqarsinnaavoq: