Uuliap arfanniartartut avissaartortippai

Alaskami Barrowimi innuttaasut tamarmik, naalungiarsunniit utoqqalinersialinnut, juullimi 55.000 koruuninik agguaqarsipput. Aningaasat uuliameersuullutillu gas-imeersuupput, USA-llu sinnerani taamaanngitsoq Alaskami nunap pisuussutai ataatsimut pigineqarput.
Taamatut allappoq Poltiiken.dk.
Taamaasilluni tassani innuttaasut inuiaqatigiinni inunni nunarsuarmi pisuujunersaapput. Barrowimili arfanniartartut isumaqatigiinngissutigaat Det Arktiske Ocean-imi uuliamik qillerineq ingerlaannassanersoq.
Ilaatigut pissutigalugit silap pissusiata allanngoriartorneratigut ajornartorsiutit, mingutsitsinissamut ulorianartoqarnera, aammattaarli pisuussutit inuiaqatigiinnik piniartunik qanoq pissusilersortitsisimanerat.
– Siusinnerukkut tamatta immitsinnut qaninnerujussuusimagaluarpugut. Maanna immitsinnuinnaq isumaginiartalerpugut, arfanniartartoq Poltiikenimut oqarpoq.