KUULTI QERNERTOQ
Uuliap akiata appasinneratigut Kalaallit Nunaanni uuliasiorneq kigaallatsinneqarpoq
Uuliap akia 90 dollarsinit qaffasinnerusariaqarpoq Issittortatta ilaani akilersinnaasumik uuliamik tunisassiortoqarsinnaassappat
Namminersorlutik Oqartussat siorna Qeqertarsuaq taamaat Nuussuullu ilarujussua neqeroorfigineqartussanngortippaat, sisamanngornermili decembarip 15-ani uuliasioqatigiiffiit arlaannaalluunniit neqeroorummik nassiussaqarsimanngilaq.
Naalakkersuisullu siulittaasuata Kim Kielsenip aamma nassuerutigaa uulia tupinnartuliornertut ittumik namminiilivinnissamut aningaasaliissutaassanngitsoq.
Aki appartoq
- Naalakkersuisut oqarsimanngillat kalaallit namminiilivinnissaat uuliamik gassimillu qalluinikkut aningaasalerneqarsinnaasoq, Kim Kielsen Demokraatiniit Randi Vestergaard Evaldsenimut Justus Hansenimullu akissummini Canadami oqalugiarneq oqallisaaqisoq tunngavigalugu oqarpoq.
- Siusinnerusukkut Kalaallit Nunaata kitaani Tunumilu nunarsuarmi uuliasioqatigiiffiit annersaasa ilaasa neqeroortarnerannut naleqqiullugu sooruna uuliamik gassimillu ujaasinissaq soqutigineqarunnaarsimasoq?
- Uuliap akiata 2014-imiillu takusimasatta appariartornera peqqutigalugu uuliasioqatigiiffiit sumiiffinni aningaasartuuteqarnartupilussuarni uuliaqarfinnik nutaanik ujaasinissaminnut aningaasaatikinnerulersimapput, ullunilu makkunani aamma takusinnaavarput uuliasioqatigiiffiit siusinnerusukkut Kalaallit Nunaanni Issittortatsinnilu suliaqartartut ujaasiffissaminnit tunuartertut akilersinnaajunnaarsimanera peqqutigalugu, nunatsinni uuliasioqatigiiffitta Nunaoil A/S-ip pisortaa Hans Kristian Olsen oqarpoq.
Appariangaatsiartoq
Juunimi 2014-imi Nordsømit uulia nappartamut 114 dollarseqarpoq, ukiup affaa qaangiummat 54 dollarsinut apparluni. Januaarimi 2016-imi 29 dollarsinik apparpoq sapaatit akunnerani uani Nordsømi uulia nappartamut 55 dollarseqarluni.
Nunarsuarmi tamarmi uuliamik tunisassiortut 2015-imi ukiut siuliinit tallimanit 20 procentimik ujaasinermut atuinikinnerupput.
Allaaserineqartoq aviisimi Sermitsiami tamaat atuarneqarsinnaavoq. Aviisi uani pisiariuk: