uulia
Uuliamik ujaasineq unitsinneqassanngitsoq
Naalakkersuisut uuliamik ujaasinerit unitsinnissaannut maanna pilersaaruteqanngillat, naak USA-p Canadallu Issittup imartaani uuliasiorluni qillerinerit unitsikkaluaraat
USA-p præsidentiata Barack Obamap aamma Canadap premiermisteriata Justin Trudeaup ataatsimut naluunaaruteqarnerminni, nunat taakku Issittup imartaani uuliasiornissamut akuersissutinik neqerooruteqaqqissanngitsut naqissuserpaat.
Tamatumalu pinngortitaq pillugu nunarsuaq tamakkerlugu suliniaqatigiiffiup WWF-ip, Kalaallit Nunaat uuliamik ujaasinermik unitsitsisunut ilannguteqqullugu kajumissaaritippaa.
Periusissiaq malinniaraat
Kisianni avatangiisinut suliniaqatigiiffiup tamanna naatsorsuutigissanngikkallarpaa. Aatsitassanut naalakkersuisup, Múte Bourup Egedep (IA) tamanna naqissuserpaa.
- Uuliamut aatsitassassiornermullu periusissamik peqarpugut, taannalu Naalakkersuisut malinniarpaat, taanna oqarpoq.
Maanna periusissarineqartoq 2014-imi atuutilerpoq, 2018-illu tungaanut atuutissaaq. Tassanilu ersarilluinnartumik allaqqavoq, uulia piffissami qaquguugaluarnersumi nunamut isertitaqartitsisuussasoq.
Baffinnip Kangerliumanersuani, Ikersuaq Davisimi, Nuup kitaani, Jameson Landimi, Nuussuarmi, Kujataani aamma Kujataata kitaani akuersissutinut suliarinnittussarsiortoqassaaq.
Periusissiaq ilutigalugu Naalakkersuisut aappaagu akuersissutinik nutaanik suliarinnittussarsiussapput. Suliarinnittussarsiuussinerillu ilaatigut WWF-imit isornartorsiorneqarput.
- WWF-ip oqariartuutaa tusaatissatut tiguara, Múte Bourup Egede oqarpoq.
Kisianni saniatigut naqissuserpaa, uuliamut aatsitassanullu periusissaq 2018-ip naanerani naammassisussaq malinniarlugu eqqarsaatigalugu.
Atuaruk: WWF: Uulia taamaatinneqarli
Periusissiassap nutaap imassaa oqaatigissallugu siusippallaartoq
Naalakkersuisut maanna 2019-imit atuutilertussaq suliaralugu aallartissavaat. Kisianni aamma tassani aatsitassanut naalakkersuisup uuliamut pilersaarutit peerneqarnissai neriorsuutiginianngilaa.
- Oqaaseqarfigissallugu maanna siusippallaarujussuarpoq, taanna oqarpoq.
Ukiuni kingullerni Issittumi uuliamik ujaasiniarnermut soqutiginninneq aamma ingasassimanngilaq.
Aki annertuumik appariarnikuuvoq, Parisimilu sila pillugu isumaqatigiissut atulissappat, uuliamik atuineq ukiuni aggersuni annikillineqartussaavoq.