Nerisariiaat
Uuliakoortoqalaarneraniluunniit nerisariiaat tulleriiaat suujunnaarsisinnaavai
Danskit ilisimatuui misissuineranni paasinarsivoq, naak annikitsuinnarmik uuliakoortoqaraluartoq annertuumik sunniuteqarsinnaasoq. Issittumi uuliasiortoqalissappat annertuumik innarliisinnaasoq ilisimatooq oqarpoq
Kinguit issuttup imaaniittut nerisariiaat akornanni pingaaruteqartuupput. Nerisariiaanni ilaajunnaassagaluarpata nerisariiaat akornanni kingunipiloqarsinnaavoq, aalisakkat inuillu eqqorneqarsinnaallutik.
Taamaammat issittumi uuliasiortoqalersinnaanera ajoqquseerujussuarsinnaavoq. Umiarsuit angalaneranni uulia aniatinneqartoq annertusissaaq, uuliasiornermilu uuliakoorneq annikitsuinnaagaluarput annertuumik innarliisinnaasoq misissuisartut paasivaat. Kinguit eqqorneqarnerpaassasut paasineqarpoq.
DTU aqua-mi professorip Torkel Gissel Nielsen oqarpoq, Rasmus Dyrmose Nørregaard immikkut ilisimatusartoq Aarhus Universitetimeersoq peqatigalugu misissuivoq. Grønlands Klimacenterimi misissuineq ingerlanneqarpoq.
- Issittumi uuliaqarluarpoq. Uuliasiortoqalissagaluarpat uuliakoortoqarnissaa saneqqunneqarsinnaanngilaq. Misissuinitsinni paasivarput annikitsunnguamilluunniit immamut uuliakoortoqaraluarpat kinguit mannii inerissinnaajunnaassasut. Immami kingoqarunnaassappat aalisakkat nerisaqarunnaassapput, taamaattumik annikitsuinnarmilluunniit uuliakoortoqarsagaluarpat annertuumik nerisariiaat akornanni eqquisussaavoq, Torkel Gissel Nielsen oqarpoq.
Misissuisimaneq pillugu saqqummersartumi Ecotoxicology-mi saqqummeqqammerpoq.
Kinguit nerisariiaat akornanni pingaaruteqartorujussuupput, tassami nerisariiaat akornanni naqqarlersaattut inissisimagami, aalisakkanit nerineqartarluni. Kinguit algit nerisarpai, nerineqarsinnaanngortarlunilu.
Kinguit ilaat Calanus hyberboreus misissuinermi misissorneqartut ilagaat, kingunni orsutaqarnersaavoq, issittumilu kingunni pingaarneraajulluni.
Issittumi inuussagaanni orsoq uumaniarnermi pingaaruteqarpoq. Kinguit orsoqarluartut tammassagaluarpata amigaataalersussaapput, algimmi orsuat annikippallaarami, taamaasilluni aalisakkat, timmissat naggataatigullu arferit, puisit, nanut inuillu eqqorneqassallutik.
- Uuliakoortoqarnera pissutaalluni orsulikkaanik kingoqarunnaassagaluarpat imaassinnaasoq allanit uumasuaqqanit taarserneqartut. Uumasunulli kingunnut nerisaqartartunut assigiinnassavaa soorlu orsutortarunnaarnermiit suaasat panertunut nerisaqartalerneq, sulilu issittumi nillertumi annanniartariaqarlutik. Taamatulli annattoqarsinnaanngilaq, taamaattumik uuliakoorneq annikitsuinnaq annertuumik nerisariiaannut sunniuteqassaaq, Torkel Gissel Nielsen oqarpoq.