Uuliaarluerneq pillugu unnugu Qaanaami innuttaasunik ataatsimiititsisoqassaaq
WWF Verdensnaturfonden unnugu Qaanaami innuttaasunik ataatsimiititsissaaq, sammillugit uuliaarluernerup aalisarnermut, piniarnermut pinngortitamullu kinguneqaatissai
Sapaatip akunnerani kingullermi taamatut Upernavimmi innuttaasunik ataatsimiititsereerluni WWF Verdensnaturfonden unnugu Qaanaami innuttaasunik ataatsimiititsissaaq, tamatumani eqqartussallugu uuliaarluertoqassappat uulia sumut ingerlassanersoq.
Innuttaasunik ataatsimiititsinermut tunuliaqutaavoq suliniut nutaaq tamanna peqatigalugu Canadami Alaskamilu ingerlanneqartoq, tamatumani Issittumi uuliap siammarneratigut takorloorsinnaasat assigiinngitsut saqqummiunneqarlutik.
Takorluugarpassuit
WWF-ip immikkut ilisimasallit canadamilu peqatigisani suleqatigalugit saqqummiunniarpaat, assersuutigalugu uuliamik ujaasinermi imaluunniit umiarsuup takornariartaatip ikkarlinnerani, uuliaarluinernerup kinguneqaatissai.
WWF siusinnerusukkut Nunavutip avannaani Beauforthavetimi suliniummik taamaattumik ingerlatsisimavoq, tamatumani takorluukkat assigiinngitsut 22-t mississorneqarlutik.
– Takorluukkanik assigiinngitsunik sulineq aallartilerpoq, soqutigisorujussuuvarpulli tusassallugu innuttaasut ajornartorsiut qanoq eqqarsaatigineraat, Mette Frost WWF Verdensnaturfondenip nunatsinni suleqatigiissitaaneersoq, Qaanaami innuttaasunik ataatsimiititsisussaq oqarpoq.
Unnugu ataatsimiititsissaaq
– Soorunami uuliaarluertoqarnissaa neriuutiginngilarput, pingaaruteqarporli ilisimassallugu uuliaarluertoqassagaluarpat tamanna assersuutigalugu aalisarnermut, piniarnermut pinngortitamullu qanoq kinguneqassanersoq. Tamatumunnga atatillugu sapinngisamik annertunerpaamik pilersorneqarnissarput atorfissaqartipparput, taanna oqarpoq.
Innuttaasunik ataatsimiititsineq pissaaq Avanersuup Atuarfian nal. 19.30-miit 21.30-mut. Ataatsimiititsinermi oqalutseqassaaq unitsiarnermilu kaffeqarlunilu kaageqassaaq.