Friday, July 28, 2017 - 12:20

Uulia pillugu saqitsaannermi inuit eqqartuussisuuneqarfimmi ajugaapput

Jerry Nantanine, Clyde Riverimi borgmesteriusimasoq pingaarutilimmik eqqartuussivimmi ajugaanerup kingorna tusagassiortunik katersuutsitsinermi uani takuneqarsinnaavoq.
Assi.: David Kawai/Greenpeace
Canadap avannaani inuit pingasunngornermi eqqartuussisuuneqarfimmit taperserneqarput, taamaalilluni uuliasiornissamut atatillugu misissuinissat unitsinneqarput.

Canadamiut energiagenturiata siornatigut ingerlatseqatigiiffiit uuliasiorniartut Baffin Islandip avannaata kangiani Nunavumi misissuinissaannut akuersissuteqarfigisimagaluarpaa. Oqartussalli piffimmi nunap inoqqaavit iluamik tusarniaaffiginissaat puigorsimavaat.

Clyde Riverimi inuit 1000-t missaanniittut najugaqarput.

Piniartut, aamma piffimmi inuiaqatigiinnut aamma Greenpeacemut eqqartuussisuuneqarfiup aalajangiinera qiimmatsatsitsivoq.

Immap naqqanik sajutsitsilluni misissuinerit immap naqqani nipituumik nipiliortitsinikkut pisarpoq. Uuliasiortut taamaaliornikkut uuliaqarfiit gasseqarfiillu immap naqqaniittut sumiissusersisinnaasarpaat.

Immap naqqani nipiliornerit sakkortuut arfernik imaanilu uumasunik allanik ajoqusiillutillu qimaatitsinissaat, inuit qunugiuaannarsimavaat.

- Uunga aalajangiinermut eqqartuussisuuneqarfimmut qujamasuttorujussuuvunga, inuiaqatigiinut imaanilu uumasunut pisariaqartitatsinnut illersuisumut, Clyde Riverimi borgmesteriusimasoq oqarpoq.

Clyde River nunap inoqqaavisa pisinnaatitaaffiinut nunarsuaq tamakkerlugu pingaarutilimmik ajugaasoq, Clyde Riverip eqqartuussissuserisua Nader Hasen oqarpoq.

Eqqartuussiviit qullersaata suliap naammassinnginnerani suliaq ukiut pingasut sinnerlugit ingerlanikuuvoq.

Seneste nyheder / Nutaarsiassat kingulliit