Kalaallit Nunaat Tivolimi
Utoqqasaanit nuannarisaq Gameboy neriorsuutigaa
Elektroniskimik nipilersortartoq Nuummeersoq Aqqalu Engell tallimanngorpat arfininngorpallu Kalaallit Nunaat Tivolimi nipilersussaaq. Taamaasillunilu sinnattuni piviusunngortissavaa
Elektro-mik nipilersortartoq ´Uyarakq´, Aqqalu Engell Nuummeersoq, kalaallit Kalaallit Nunaata avataani kulturikkut pisoqartitsisarneranni annerpaami, sapaatip akunnerata naanerani Kalaallit Nunaat Tivolimi ingerlanneqarpat, nipilersornissaminut pissangasorujussuuvoq.
– Ukiorpassuarni isumaliutigalugulu sinnattorisimavara Kalaallit Nunaat Tivolimi nipilersornissara, maannalu sinnattoq piviusunngussaaq. Pissangaqaanga, Aqqalu Engell Sermitsiaq.AG-mut oqaluttuarpoq.
Tupaallassimaqaaq
Aqqalu Engell tupaallassimaqaaq qaammatit marluk matuma siornatigut aperineqarami aaqqissuussinermi Kalaallit Nunaat Tivolimi nipilersorsinnaanersoq.
– Taamanikkut tupaallaqaanga e-mailikkut aperineqarama. Aammalu kimulluunniit oqaqqusaananga, tamanna ajornakusoorsimaqaaq. Aatsaat oqaatigisinnaasimavara aaqqissuussisut tamanna nalunaarutigereerpassuk, Aqqalu Engell oqarpoq.
Isumaqarpit Kalaallit Nunaat Tivolimi nipilersuleruit aatsaat taama amerlatigisunut tusarnaartitsissallutit?
– Takussavarput aatsaat taama amerlatigisunut tusarnaartitsissanerlunga, Aqua-kulli Nuummi tusarnaartitsimmata qilanaartuutitut nipilersorsimavunga, taamanikkullu inuppassuupput, nipilersortartoq oqaluttuarpoq.
Erinarsukkat atoqqillugit
Kalaallit Nunaat Tivolimiittut nipilersuleruit suut atussagitit naatsorsuutigissavaat?
– Nipilersukkanik atueqqittartorujussuuvunga, kalaallit erinarsuutitoqaat, ilaatigut Game Boy-toqaq atorlugu, elektroniskinngorlugit sanaqqittarpakka. Taamaasilluni tusarnaartut siunissaq nipilersuutikku takusinnaavaat, tamanna peqatigalugu qanganeersumik tusagaqarlutik, Aqqalu Engell oqarpoq.
Taanna oqaluttuarpoq tusarnaartut ilaatigut Ole Kristiansenip, Sume-kut Qarsukkullu atortagaat tusaajumaaraat.
Aqqalu Engellip, eqqumiitsuliortutut ´Uyarakq´-mik atillip, 2014-imi nuutit marluk saqqummersippai ´Savimineq´ kingullermillu ´Raatiu Nukik´. Siusinnerusukkulli aamma EP-nik marlunnik nuuteeqqamillu saqqummersitsinikuuvoq.
Kalaallit Nunaat Tivolimi aallartissaaq tallimanngornermi juulip 31-anni naassallunilu arfininngornermi aggustip aallaqqaataani.
Tassani misigineqarsinnaapput tusarnaartitsinerpassuit, eqqumiitsuliortut sannavii, kalaalimernit, tuniniaaviit, qaannamik takutitsinerit unammisitsinerillu.
Sume-kut nuannersuliaasa ilaat Uyarajkq-p qanoq atorneraa uani tusarnaaruk