nunatsinnit

Utoqqarnut politikki pillugu Paamiuni isumasiuineq

Kommuneqarfik Sermersuumi siunissami utoqqarnut atugassarititaasussat pillugit Paamiuni katersortarfimmi Taqqissuummi oqaluuserineqarmat inuit 24-t peqataapput

Paamiuni oqaluffik 1909-mili sananeqarsimasoq

Pingasunngorneq 2. septembari 2015 nal. 19 Paamiuni Najukkami Ataatsimiititaliaq aamma Utoqqaat Siunnersuisoqatigiivini ilaasortaq innuttaasunik ataatsimiititsipput.

Innuttaasut 24-t takkuttut saniatigut Paamiuni Najukkami Ataatsimiititaliamut ilaasortat aamma Utoqqaat Siunnersuisoqatigiivinut ilaasortaq peqataapput.

Tigulluarneqartut
Innuttaasunut ataatsimiititsinerup tunngavigaa Kommuneqarfik Sermersuumi innuttaasut tamat peqataatinneqarnissaannik kissaatigisaq piffissami qaninnermi utoqqarnut suliassaqarfik pillugu utoqqarnut politikkimik aamma utoqqaat pillugit pilersaarummik nutaamik aaqqissuussisoqartussaanera.

Takkuttut tikilluaqquneqarput ataatsimiititsinermi siunertaq naatsumik sammineqarpoq aamma suliassaqarfimmut pilersaarut taamatullu utoqqarnut politikki saqqummiunneqarlutik. Saqqummiussisoqareermat peqataasut pitsanngorsaanissamut siunnersuutissanik oqallipput Najukkami Ataatsimiititaliamut ilaasortat oqallittut akornanni pitsanngorsaatissatut siunnersuutinik allattuipput.

- Takkuttut taamak amerlatiginerat nuannaarutigaara oqallinnernik arlalinnik pingaaruteqartunik tunngavissiimmata. Utoqqarnut politikkip nutaap aamma utoqqarnut suliassaqarfimmut pilersaarutip angujumaagassai qilanaarutigaakka, Najukkami Ataatsimiititaliami ilaasortaq Niels Lorentzen oqarpoq.

Siunnersuuterpassuit
Ataatsimiigiartut pitsanngorsaataasinnaasunut arlalinnik pitsaasunik siunnersuutissaqarput.

Assersuutigalugu taaneqarpoq utoqqarnut sammisassat arlaqarnerusut aamma meeqqerivinnit, atuarfimmit illoqarfimmilu innuttaasunit allanit utoqqarnut pulaartartunik aaqqissuussineq.

Tamatuma saniatigut Paamiuni utoqqarnut paaqqutarinnittarfimmik amigaateqarnera oqaluuserineqarpoq.

- Kikkut tamat tusaanissaat kissaatigaarput siunissamut pilersaarummik qulakkeerinnissutaasumik aamma utoqqarnut politikkimik pitsaasumik suliaqarniassagatta. Siunnersuutit pitsaasut amerlasuut atuaqqissaarnissaat qilanaarutigaara, Isumaginninnermut, Suliffeqarnermut Inuussutissarsiornermullu Ataatsimiititap siulittaasua, Malene Lynge (IA), oqarpoq.

Powered by Labrador CMS