Kommune Kujalleq

Utoqqalinersiallit amerlavallaanik tunineqartarsimapput

Kukkunersiuisut Kommune Kujalleq naveerpaat siusinaartumik utoqqalinersiat utoqqalinersiallu tunniunneqarneranni amerlavallaanik kukkuluttortarsimammat. Sukaterileruttorpugut, kommuni akivoq

Kommune Kujallermi siusinaartumik utoqqalinersialinnut nalinginnaasumillu utoqqalinersialinnut tunniussisarnerit iluarsaanneqaleruttorput. Qaqortumit assi

Kommune Kujallermi inuit 65-it sinnerlugit ukiullit ilaat inuussutissaminnik pisortanit aningaasanik amerlavallaanik tunineqartarsimapput. Tamanna paasineqarpoq kukkunersiuisarfiup BDO Revisionip, 2015-imi kisitsisit nutaajunerpaat tunngavigalugit kukkunersiuinerani.

Ilanngaatigisassat

Kukkunersiuisut ilaatigut paasisimavaat ukiumi siulianisulli pisortanit ikiorsiissutit ilanngaatigineqartarnerat ajornartorsiutaasartoq, kingumut atuutilersumik siusinaartumik utoqqalinersiaqalernissamut akuersissuteqartoqarsimagaangat. Pisuni arlalinni pisortanit ikiorsiissutinit tunniunneqarsimasunit ikippallaartut ilanngaatigineqartarsimapput.

Utoqqalinersiat tukattut

– Paasivarput siusinaartumik utoqqalinersialinnut kontumit 65-inik ukioqalereersimasut utoqqalinersiaqartinneqartartut. Siusinaartumik utoqqalinersiallit, 65-inik ukioqaleraangata qaammammi 65-inik ukioqalerfimmik tulliani nalinginnaasumik utoqqalinersiaqalertartussaapput, BDO Revision kukkunersiuinermini allappoq tikkuaallunilu:

– Pissutsit kattussinermut pingaaruteqarmata, inuillu ilaannut immaqa tunniussanut pingaaruteqarmata inassutigineqassaaq tamanna iluarsiniarlugu misissuisoqassasoq.

Nutarterneqarneq ajortut

Suliassat misissorneqartut ilarpaaluini siusinaartumik utoqqalinersiaqalernissamut qinnuteqartoqarsimanngilaq, taamatuttaarlu uppernarsaatissaqarani sulisinnaaqqilernissamut misiliisoqartarsimanersoq.

Kukkunersiuisut avataaneersut misissuinerminni paasisimavaat suliassani arlalinni pisortanit ikiorsiissutit ikippallaartut ilanngaatigineqartarsimasut.

Tusaatissatut tiguvaat

Kommune Kujallermi aningaasaqarnermut pisortaq Kim Rosendahl paasissutissiivoq kukkunersiuisut oqaaseqaataat tusaatissatut tiguneqartut.

Kim Rosendahlip paasissutissiissutigaa pisimasut ilaanni pineqartut kingumut atuutilersumik siusinaartumik utoqqalinersiaqalernissamut akuersissutit. Tamakkua ilanngaateqartinneqartussaasinnaapput kingumoortumik qaammatinut arlalinnut imaluunniit allaat kingumoortumik ukiumut ataatsimut, apeqqutaalluni siusinaartumik utoqqalinersiaqalernissamut qinnuteqaat qanga tiguneqarsimanersoq.

Allanneqarneq ajortut

Tamassuma tungaanut inuk pisortanit ikiorsiissutinik pisarsimappat tamakkua siusinaartumik utoqqalinersiaqalersitsinermi ilanngaatigineqassapput. Siusinaartumik utoqqalinersiaqalersumit ilanngaatissat nalinginnaasumik kommunip isumaginninnermut immikkoortoqarfianut nalunaarutigineqartassapput.

Tassanilu kukkuneq pivoq, tassa siusinaartumik utoqqalinersiaqalersitsinermik allakkiani allanneqarsimanngimmat siusinaartumik utoqqalinersianit siullernit qanoq amerlatigisut ilanngaatigineqassanersut.

– Isumaginninnermut tunngasuni tamani qanoq ingerlatsinissamut allakkiat periutsillu misissorneqaleruttorput, aningaasaqarnermut pisortaq Kim Rosendahl erseqqissaavoq.

Powered by Labrador CMS