Utoqqaat Sukamut: Aappariit naggueqatigiinngitsut eqqaamallugit

Namminiilivinnermut, Pinngortitamut, Avatangiisinut Nunalerinermullu Naalakkersuisoq naalakkersuisoq Suka K. Frederiksen namminiilivinnissamut aqqummi utoqqaat peqatigiiffiat, Nuummi Utoqqaat Peqatigiiffiat ataatsimeeqatigigamiuk siunnersorneqarpoq. Naalakkersuisut nittartakkaminni taama ilisimatitsipput.

Utoqqaat namminiilivinnissap oqallisigineqarnerani sammisat pingaartitatik oqaasertalerpaat. Sammisallu ilagaat ilaqutariit assigiinngitsunik nagguillit.

- Meeqqat amerlasuut aappariinnik naggueqatigiinngitsunik angajoqqaaqarput taakkulu ilanngullugit eqqarsaatigineqarnissaa eqqaamaneqartariaqarpoq. Oqaatsitik imaluunniit tunuliaqutitik pissutigalugit inuiaqatigiinnit kalaallinit arlaataluunniit mattunneqartutut misigisimannginnissaa pingaaruteqartoq erseqqissarneqarpoq, eqqartuinermi atuarneqarsinnaavoq.

Atuaruk: Namminiilivinneq pillugu ataatsimiititsinerit soqutigineqarluartut

Aningaasartuutit amerlavallaartut
Utoqqaat aamma oqaatsivut nukittorsartuarlugit ingerlatsisoqartariaqartoq kissaatigaat, taamatullu pisortat aningaasartuutaat sipaarniarfiusariaqartut naalakkersuisumut siunnersuutigaat.

- Namminiilivinnissamut ingerlaarnermi allaffissornerujussuaq “immaqa nunarsuarmi akisunerpaamik ingerlataqarnitsinni” qanoq akikinnerusumik ingerlanneqarsinnaanera ujartortariaqartoq apuunneqarpoq, tamanna oqaatigineqarpoq.

Utoqqaat inuusuttut nersualaarpaat
Naak utoqqaat utoqqalinerminni inuuniarnermi atukkat artornarsinnaagaluartut maluginiaqqugaluarlugu, inuusuttut ilinniartut nersualaarneqarnissaat pingaartippaat.

- Ilinniagaqarnissamut sapinngitsut tulluusimaarutigalugit takutinnerusariaqarpagut, amerlanerusut malinnaaniassammata – aammalu ilinniagaqarneq inuunerminnut nunaminnullu qanoq pingaaruteqartigisoq inuusuttut paasineruniassammassuk, akissutigineqartut ilaat Suka K. Frederiksenimut oqarpoq.

Atuaruk: Namminiilivinnissaq pillugu oqallinneq aallartinneqartoq

Tamanna naalakkersuisumit isumaqatigineqarpoq.

- Atuarnissaq pingaaruteqarpoq taamatuttaaq tapersersuinissaq, kaammattuinissaq, nersualaarinissaq aammalu aalajangiusimasinnaaneq pingaarnertut angajoqqaat avatangiisillu tamatta suliassaraarput, Namminiilivinnermut, Pinngortitamut, Avatangiisinut Nunalerinermullu Naalakkersuisoq Suka K. Frederiksen naggasiinermini oqarpoq.