Friday, January 12, 2018 - 13:45

Utoqqaat puiortunngorsimasut utoqqaat angerlarsimaffiinut unammillertitsipput

Assi.: Benny Kokholm
Innuttaasut utoqqaat puiortunngornermik nappaatillit amerliartorput kommunimulli immikkut unammillernarlutik. Ullumikkut Nuummiinnaq utoqqarnut puiortunngorsimasunut inissat 30-t amigaatigineqartut, kommunip nalilerpaa.

Kommuneqarfik Sermersuumi kommunalbestyrelsip, Isumaginninnermut Suliffeqarnermullu Ingerlatsivik innuttaasunut utoqqarnut puigortunngortunut angerlarsimaffimmik pilersitsinissamut periarfissanik misissueqqusimavaa.

Immikkut unammilligassaq

Utoqqarnummi puiortunngorsimasunut pitsaasumik neqerooruteqarsinnaaneq immikut unammillerfiuvoq. Tamanna utoqqaat angerlarsimaffiisa qanoq naleqqussarsinerinut – assersuutigalugu utoqqaat puiortunngorsimasut sapingaannik takivallaanik torsuusanik atuiffiunngitsuni – taamaallaat atuunnani, sulisulli tugaanniit, utoqqarnik puiortunngorsimasunik sullitaqarnerminni aamma nukinnik amerlanerungaatsiartunik pisariaqartitsisoqarpoq.

Utoqqaat angerlarsimaffiini innuttaasumut sulisorineqartussaq 0,9-nissaa aalajangerneqarsimavoq, utoqqaallu puiortunngorsimasut angerlarsimaffiini innuttaasumut sulisorineqartussat 1,3-t pisariaqartinneqarlutik.

Sulisummi piginnaasaasa qaffasissusaat aamma qaffasinneruvoq, tamanna kommunip missingersuutaannut artukkiivoq.

56-it puiortunngorsimasut

Kommuneqarfiit pingaarnersaanni paasineqarsimavoq ullumikkut utoqqaat puiortunngorsimasut 56-it innuttaasorineqartut, taakkuli kommunip utoqqarnut angerlarsimaffiini assigiinngitsuni najugaqarput, taakkunannga 40-t Nuummi najugaqartuullutik.

Ullumikkut kommune Tikitami innuttaasunut puigortunngortunut immikkut nakkutigineqartunik qulinik inissaqartitsivoq. Paasinarsivorli Nuummi puiortunngortunut inissat 30-nik amerlanerusut pisariaqartinneqartut, ingerlatsivimmilu qularutigineqanngilaq pisariaqartinneqartut amerliartuinnarumaartut.

Kommunip utoqqarnik puiortunngorsimasunik unammilligassartaanik misissuinera aallarteqqammerpoq, taamaakkaluartoq innuttasunut 22-nut inissaqartitsisumik utoqqaat puiortunngorsimasut angerlarsimaffiinik pilersitsisoqarnissasoq, ingerlatsivik naliliivoq. Tamanna ajornartorsiummut aaqqiissutaanngikkaluarpoq, ingerlatsivimmilu pisortaanerungallartup, Kista Lynge Høeghip, amerlassutsit pillugit ataatsimiitamut saqqummiussinermini ima tunngavilersuivoq:

- Tassa puigortunngortunut paaqqutarinniffimmik siunnersuummi pioreersut aallavigineqarmata kiisalu ilinniarsimasunik sulisunik pissarsiniarnissamut qanoq piviusorsiortiginera aallaavigalugu naliliisoqarluni.

Immikkut avatangiisit

Utoqqarnut puiortunngorsimasut avatangiisit pingaaruteqartuupput, maluginiutillu pingaartumik eqqumaffigineqartussaapput.

- Puigortunngortunut angerlarsimaffik ineqartunut alianaatsuussooq, tassanilu ineqartut maluginiutaannut sunniuteqarluarsinnaasumik inip iluarsartuunneqarnissaa pingaartinneqassaaq. Tassa imaappoq ilaatigut neriffissap nalaani immikkoortuni nerisassat qalarlaat naamaneqarsinnaassapput, taamalu nerinissamut illigusunneq pilersinneqartassalluni, nipilersutinik eqqissisimasunik tusarnaartoqartassaaq, ukamartartumik issiaveqassaaq issiaarfigineqarsinnaasoq, isikkat kinisimaarnissaannut imaluunniit niaqqukkut tangiartortinnissamut periarfissaqassaaq. Tamatuma saniatigut avatangiisit peqqinnissamut tunngatillugu ineqartunut tulluarsagaassapput, sulisullu pitsaasumik suliffimmi avatangiiseqarlutik suliatik suliarisinnaassavaat, saqqummiussami allassimavoq.

Periarfissat pingasut

Ingerlatvisivik pingasunik periarfissanik suliaqarsimavoq:

  • Periarfissaq A Pakkutaq, Ippiarsummi inuusunnerusunut innarluutilinnut immikkoortortaq, inissat 12-it puigortunngortunut angerlarsimaffinngortinneqassapput. Ippiarsuullu eqqaani inuusunnerusunut innarluutilinnut angerlarsimaffimmik pilersitsisoqarluni. Utoqqaat Illuanni, ininik qulinik, innuttaasunut puigortunngortunut immikkoortumik pilersitsisoqassaaq. Taamaalilluni illoqarfik tamakkissavarput innuttaasullu ungasippallaanngitsumut nuussinnaassallutik.
  • Periarfissaq B Punkt 04B: Innuttaasunut utoqqaanerusunut puigortunngortunut angerlarsimaffimmik pilersitsinissamut periarfissanik misissuineq Pakkutaq, Ippiarsummi inuusunnerusunut innarluutilinnut immikkoortortaq, inissat 12-it taamaaginnartinneqassapput. Ippiarsuullu eqqaani, 22-nik inissalimmik, puigortunngortunut angerlarsimaffimmik pilersitsisoqassalluni.
  • Periarfissaq C Pakkutaq puigortunngortunut angerlarsimaffinngortinneqassaaq. Utoqqaat Illuanni innuttaasunut puigortunngortunut immikkoortumik, qulinik inissalimmik, pilersitsisoqassaaq. Qinngutsinni inunnut innarluutilinnut angerlarsimaffimmik pilersitsisoqassaaq, tassani siornatigut pilersaarutitut saqqummiussaq pioreersoq atorneqarsinnaavoq. 

Politikkikkut akuerineqassappat taakkua atorlugit sulisoqarnissaa pilersaarutaavoq.

Seneste nyheder / Nutaarsiassat kingulliit