tunissut
Utoqqaat inissiamik tunisigit
Namminersorlutik Oqartussat inissiaataanni ukiut 25-it sinnerlugit najugaqarsimasut inissiamik tunineqartariaqarput. Partii Naleqqaminngaanneersoq Anthon Frederiksen taama isumaqarpoq.
Namminersornerullutik Oqartussat inissiat akeqanngitsumik kommuneqarfinnut tunniussinnaappagit inissiat utoqqalinersialinnut tunniutiinnaraanni assigiinnarpaa.
Partii Naleqqaminngaanniit Anthon Frederiksen taama oqarpoq. Anhton Frederiksenip aappariit utoqqalinersiallit qanoq naammattusaarisarnerat misissorsimavaa.
Amingartoortuarneq
Aappariit qaammammut 6.859 koruuninik pissarsisarput kisiannilu akiligassaat katillugit 10.327 koruuniullutik, Anthon Frederiksen taama oqarpoq. Akiligassat annertunerunerannut patsisaavoq ineqarnermut, kiassarnermut, innaallagiaqarnermut oqarasuaammullu akiligassat.
Aamma atuaruk: Ukiut tallimaannaat qaangiukkaangata inissiamik tigusisinnaanngorneq
- Tupinnaqaaq paasiuminaallunilu utoqqaat ukiorpassuarni inuiqatigiinnut sullissilluareersimallutik aningaasaqarnikkut taama ajortigisumik inissisimalertarnerat, Anthon Frederiksen oqarpoq. Taamaattumik utoqqaat, soorlu assersuutigalugu minnerpaamik ukiuni 25-ini inigisami Illumiluunniit Namminersorlutik Oqartussat pigisaanni aaliangersimasumi najungaqarsimasut immikkut ittumik periarfissinneqarnissaat matumuuna ujartorpara.
Akeqanngitsumik tunniunneqarsinnaasut
Anigaasaqarnermut Inatsit 2017-imi akuersissutigineqarneranut atatillugu oqaasertaliussat ilaanni Naalakkersuisut kommuninut ataasiakkaanut Namminersorlutik Oqartussat inissiaataannik 1.1.2018-imiit akeqanngitsumik tunniussinissaq siunertaralugu isumaqatiginninniarnissamut isumaqatigiissuteqarnissamullu piginnaatinneqarput.
Aamma atuaruk: Asii inissiat pillugit: Neriorsuigaangama eqquutsittarpakka
- Taamaattumik utoqqaat, soorlu assersuutigalugu minnerpaamik ukiuni 25-ini inigisami Illumiluunniit Namminersorlutik Oqartussat pigisaanni aaliangersimasumi najungaqarsimasut immikkut ittumik periarfissinneqarnissaat matumuuna ujartorpara, Anton Frederiksen erseqqissaavoq.
Inissiat 6200-ut
Inissiat A/S INI-mit allaffissornikkut ingerlanneqartut katillugit 9600 missaaniipput, taakkunanngalu 6200 missai Namminersorlutik Oqartussanit pigineqartut.