USA-p mittarfiliortiternissani Kinap akuutinneqannginnissaa anguniarpaa

Kinamiut Nunatsinni mittarfiliortiternissamik soqutiginninnerat Washington D.C.-mi aamma Københavnini naalakkersuisut avissaartuutsippaat. Politiken arfininngormat taama allaaserisaqarpoq.

USA kiinamiut mattutivinneqarnissaannik kissaateqartoq, danskit naalakkersuisuisa kiinamiut sanaartugassanik suliarinnittartut mittarfinni sanaartornermut periarfissinnissaat annertuumik ajornartorsiuteqanngitsutut isigaat.

Amerikamiut juniorforsvarsministeriat, Katie Wheelbargerip, oqarnera naapertorlugu, kiinamiut Nuummi Ilulissanilu mittarfinnik sanaartornissamik soqutiginninnerat Pentagonimit ernumassutigineqarpoq.

- Kiinamiut aningaasaliinermikkut sakkutooqalernissamut ammaatitut atuisarnerat maluginiartorujussuuarput. Tamanna ernumanarpoq, Kinap amerikamiut illersornissamut politikkikkut periusissiaanni salliutinneqarneranut tamanna tunuliaqutaavoq. Taakku niuernikkut aningaasaqarnikkullu periusissiaat sillimaniarnermut illersornissamullu politikkiannut attuumassuteqarluinnarpoq. Kina naammassisaqarluarluta suli suleqatigissavarput, ingammillu kiinamiut annertusaanerat pimoorullugu tiguarput, Katie Wheelbarger, Politikenimut oqarpoq.

Tamaappat USA-p kiinamiut mittarfiliortiternernut akuutinneqannginnissaat Danmarkimut Kalaallit Nunaannullu innersuussutigaa?

- Aap, Wheelbarger akivoq.

Danskit aamma amerikamiut isummernerat assigiinngissuteqartoq, illersornissamut ministerip Claus Hjort Frederiksenip (V) naqissuserpaa.

- Uagut paasinninnerput assigiinngisitaarnerulaarpoq. Mittarfinnik sanaartornissamut isumaqatigiissutip pissarsiarineranut tunngappat iluaalliutissaqarpallaanngilagut. Aatsaat ingerlatsinermut tunngassappat. Imaluunniit Kalaallit Nunaata aningaasaqarnikkut piumasaqaatinut naammassinnissinnaannginneranik isumaqarutta, taanna Politikenimut oqarpoq.