Sanktioner
USA-p Islandi arfanniarneranik pillarniarpaa
Arfanniarneq pillugu nunat tamalaat isumaqatigiissutaat Islandip ammasumik suusupagaa, tamannalu pillarneqartariaqarpoq, USA oqarpoq
USA-p Islandi pillarniarlugu isumaliutigaa arfanniarpallaartarnera pissutigalugu, amerikami oqartussaasut naapertorlugit islandimiut nunat tamalaat isumaqatigiissutaat unioqqutillugu arfanniartarmata.
Islandip arfanniartarnera nunat tamalaat uumasunik naasunillu niuernissamik isumaqatigiissutip (Cites) ataaniippoq, amerikarmiut nunanut allanut ministereqarfiat nalunaarpoq.
Taassuma suliassaq præsident Barack Obama-mut ingerlateqqissimavaa, malittarisassallu naapertorlugit taanna ullunik 60-inik piffissaqarpoq Island aningaasarsiornikkut pillaateqarfigissanerlugu.
Suliassaq tamanna 2011-mi aamma sammineqarsimavoq, taamanikkulli Obama pillaateqarusunngilaq, taarsiullugulu naalakkiilluni naalakkersuisutigoortumik iliuuseqartoqassasoq.
Island Norgelu naalagaaffinni kisiartaapput 1986-imi piffissami aalajangersimasumi arfanniarnerup unitsinneqarneranik isumaqatigiissummik ammasumik unioqqutitsisimasut.
Aamma Japan ukiut tamaasa arfernik untritilikkaanik toqoraasarpoq, oqarlunili isumaqatigiissummi iluatsitseriarfissaq atorlugu taamaasiorlutik, tassa arfernik angisuunik ´toqoraalluni misissuisinnaaneq´ atorlugu.
Islandip arfattami ilarujussui Japanimiut tunisarpai. 2014-imilu arfattassani 383-imut amerlisimavai, aali siorna arfattassani tamaasa nungussimanagit.
Nunap iluani pissutsinut ministeri Sally Jewell tusagassiorfinnut nalunaarutikkut allappoq piniarnermik unitsitsineq 1986-imeersoq arferit amerliartornerannik kinguneqarsimasoq, arferit taamanikkut aningaasarsiorluni piniarlugit nungutaangajassimammata.
Oqaaseqaat tamanna uumasunik illersuiniaqatigiiffiit nuannaarutigaat, Obama-lu kajumissaarlugu qanoq iliuuseqaqqullugu.
– Tikaagulliusaanik nungutaanissamik ulorianartorsiortunik toqoraaneq naakkittaatsuliornerinnaanngilaq, aammattaarli piffissaq qanittuinnaq isigalugu toqoraanerulluni, Taryn Kiekow Heimer, Natural Resources Defense Council-imeersoq, oqarpoq.
– Islandip tamanna suusupagissanngilaa killilimmik aningaasarsiutaanera pissutigiinnarlugu. Periuseq tamanna uumasunik nungusaataavoq naakkittaatsuliornerullunilu, taanna oqarpoq.