Pituffik
USA-p Danmarkillu naalakkersuisuisa Kalaallit Nunaat sumiginnarpaat
Pituffimmi kiffartuussinissamut isumaqatigiissutip annaaneqarnera Folketingimi aalassassimaarutigineqarpoq. Statsministeri nunanullu allanut ministeri isumasioqatigineqarnissaat piumasarineqarpoq
(Allaaserisaq nutarterneqarpoq sisamanngorneq nalunaaqutaq 06.52 Vittus Qujaukitsoq-mik tunngasortaa)
Nunanut allanut ministeri akissuteqanngilaq.
Apeqquterpassuit akineqanngitsut amerlapput.
Nunanut allanut ministeriusimasoq Per Stig Møller, De Konsevative, Pituffimmi kiffartuussinermut isumaqatigiissut annaaneqarsimanera pillugu ataatsimeereernerup kingorna oqarpoq.
- Danmarkimi naalakkersuisut Namminersorlutik Oqartussat suleqatigalugu kiffartuussinermut isumaqatigiissuteqarfigineqartoq unitsittariaqarpaat. Suliffeqarfimmi Danmarkimi allaffeqanngilaq. Danskimmi naalakkersuisuisa Igalikumi isumaqatigiissut atsiortareerpaat. Isumaqatigiissummi allaqqavoq Pituffimmi radareqarfiup nutarterneqarnissaa, taamaattumillu sullissisussaasuusut tassa kalaallit. Kalaallit angernerannut tamanna qitiulluinnartutu isigaara, Per Stig Møller oqarpoq.
Nunanut allanut ministeriusimasup oqaatigaa USA-p Danmarkip aammalu immaqa Naalakkersuisut Inatsisartunut sumiginnaasimasut. Suut ajornartorsiutaasimanersut paasiniarneqartariaqartut oqarpoq.
Nunarput Danmarkilu isumaqatigiinngitsut
Helle Thorning-Schmidt, Socialdemokraterne, isumasioqatigiinnissamit Inuit Ataqatigiinnit, Venstremit kiisalu De Konservativenit qaaqquneqassaaq.
- Apeqquterpassuit akineqanngillat. Kalaallit Nunaat USA-lu EU-mut ilaasortaanngillat. Kisiannili uani suliami EU-p inatsisai malinneqarput. Suliaq ilungersunartuuvoq, Per Stig Møller oqarpoq.
Inussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq, oqallinnerup kingorna pakatsisimaarpalaarpoq.
Suliami matumani Naalakkersuisut aamma illuatungiliuttut akornanni assigiinngissutaasoq tassaavoq, Naalakkersuisut ’pilersitsiviulluartumik siunissamullu aaqqiinissaq eqqarsaatigalugu’ danskit naalakkersuisuinik suleqateqatiginnilluarnerat, aamma neqeroortitsinerup inernerata 31. oktober 2014 nalunaarutigineqareernerata kingorna, taama naqissusiivoq Vittus Qujaukitsoq.
- Naalakkersuisut isumaqarput isumaqatigiissummut neqeroortitsinerup inerneqarnerata kingorna, USA-mut taarsiissuteqarnissaq pillugu piumasaqaateqartoqartariaqartoq. Nunaqavissunut suliffissat, ilinniartunut sungiusarfissat aamma akileraarutitigut isertitassaq qulakkeerniarlugit, danskit aamma kalaallit naalakkersuisui suli annertuumik suliassaqarput, aamma ullumi oqallinnerup kingorna, Vittus Qujaukitsoq oqarpoq.
Misissuiffigineqarnissaa IA-mit piumasarineqarpoq
Suliaq sumulluunniit attuumassuteqanngitsunit misissorneqarnissaa Inuit Ataqatigiit siulittaasuannit Sara Olsvigimit neriuutigineqarpoq:
- Ilumut politikkikkut eqqortumik una suliaq suliarineqarsimanersoq paaserusunnarpoq. Tamanna siulliullugu paasiniarneqartariaqarpoq. Amerikkarmiut inatsisaasut malissimaneraat pillugu kalaallit naalakkersuisuisa aamma danskit naalakkersuisuisa isumaqatigiinngissutigaat. Amerikarmiut eqqortumik suleriaaseqarsimanersut pillugu nunanut allanut ministerip akineqarami tamanna akissutigissagaa ataatsimiinnermi neriuutigigaluarpara. Suliami apeqqutit arlaqartut suli akineqarnissaat amigaatigaagut, Sara Olsvig Folketingimi oqallittoqareernerata kingorna oqarpoq.
Assit marluk ataani takukkit