USA
USA-p aallartitaata nutaap Nunarput tikeraarusuppaa
Carla Sands USA-p Danmarkimi aallartitaa nutaajusoq, Nunatsinnut tikeraarsuppoq
Namminiilivinnissamut, Nunanut Allanut Nunalerinermullu Naalakkersuisoq, Suka K. Frederiksen (S) sapaatip-akunnerata siuliani Danmarkimiippoq, tikeraarnerminilu inuit arlallit ataatsimeeqatigai.
Suka K. Frederiksenip amerikamiut Danmarkimi aallartitartaavat, Carla Sands, ilaatigut ataatsimeeqatigaa.
Nunatsinnut angalanissamut piareersimasoq
Amerikap aallartitaa qaammatip ataatsip matuma siorna atorfimmini aallartippoq, Danmark kisiat pinnagu aammali Kalaallit Nunaanni Savalimmiunilu USA sinniisuuffiginissaanut qilanaarutigeqaa, Namminersorlutik Oqartussat tusagassiuutinu nalunaarummi allapput.
- Kalaallit Nunaat USA-lu issittumi suliat pillugit qanimut suleqatigiipput, tassani Issittumi Siunnersuisooqatigiit aamma ilisimatusarneq sakkutooqareqarnerup saniatigut eqqartorneqarput. 2018 ukiup affaani siullermi Aallartitap Kalaallit Nunaannut tikeraarnissani piviusunngortikkusuppaa, Namminersorlutik Oqartussat paasissutissiipput.
Nunatsinni kinamiusut festivalerneq
Suka k. Frederiksen amerikamiut aallartitaasa ataatsimeeqatiginerata saniata kinamiut Danmarkimi aallatitaat Deng Ying canadamiulli aallartitaat, Emi Furuya aamma ataatsimeeqatigai.
Aallartitap Deng Yingip Kalaallit Nunaannut soqutiginninnini ersersilluarpaa, Kalaallit Nunaata Kinallu qanimut suleqatigiinnerup ineriartorsimaneq nuannaarutigaa.
- Ukiap ingerlanerani kalaallit pisortatigoortumik tikeraarsimanera kinamiunit kalaalliniillu naammagisimaarluarneqarpoq. Suleqatigiinnerup inerisaqqinnissaa qilanaarfigineqarpoq, ilaatigullu 2018-p ingerlanerani kinamiut kulturiat-, aammalu filmfestivaleqarnissaat siunertarineqarpoq, Namminersorlutik Oqartussat tusagassiuutinut nalunaarummi allapput.
Canadamiut aallartitaata Emi Furuya-ip septembarimi angalaqatigisani peqatigalugit Kalaallit Nunaannut tikeraarsimanertik qujassuteqarfigaa. issittoq pillugu siammasissumik suleqatigiinneq pillugu canadap tungaanit pitsaasutut isigineqarpoq, taamatullu ilaatigut illuatungeriilluni killeqarfiit pillugit suleqatigiinneq nuannaarutigineqarluni.