Vittup oqalugiaataa

USA-mut timmisartorneq aamma Nuummi diplomatit

Vittus Qujaukitsoq maanna ataasinngormat Canadami oqalugiaatini pillugu oqaluttuarpoq

Vittus Qujaukitsup Facebookimini assimik ikkussisimavoq, tassani Canadami oqalugiarpoq

- Quebecimi Arctic Circle Forumip ammarneqarnerani Kalaallit Nunaanni naalakkersuisooqatigiit nutaat pilersinneqarnerat annertuumik eqqartorpara, tassani Kalaallit Nunaata namminiilivinnissaanut piareersalernermi taasinerit 80% tikillugu amerlanerussuteqarluartut ataatsimoorfigisaat, Vittus Qujaukitsoq Naalakkersuisut nittartagaanni Canadami oqalugiaatini pillugu oqaaseqarpoq.

Ukiut sisamat iluanni diplomatit
Oqalugiaat tamarmi saqqummiunneqarpoq, tassanilu atuarneqarsinnaavoq, Qujaukitsoq oqalugiartarfimmit ilaatigut oqarsimavoq, Amerikamiut aamma Canadamiut Nuummi siunissami qaninnermi sinniisoqarfeqalernissaa Kalaallit Nunaata kissaatigigaa.

Atuaruk: Siulittaasuusimasut Vittus taperserpaat

- Sooq atajuartussanik Amerikamiut aamma Canadamiut sinniisoqarfiinik ukiut sisamat tulliuttut iluini Nuummi pilersitsinissaq isumaliutigissanngilarput, Vittus Qujaukitsoq aperivoq, Amerikamilu naalakkersuisunngortussat, januaarimi ivertinneqartussat, Issittoq 'isinik nutaanik' qiviarneqarnissaa kajumissaarutigaa.

USA-mi aallartitaqarfik nukittorsarneqartoq
Tamatuma saniatigut nunanut allanut tunngasunut naalakkersuisup oqaluttuaraa, Nunatta Washington D.C.-mi sinniisoqarfia Issittumi suleqatigiilernissamut tunngatillugu pitsanngorsarneqarsimasoq.

- Ataatsimik sulisoqarluta aallartippugut. Ukiup matuma naanerani Washington D.C.-mi sisamanik sulisoqarnissarput naatsorsuutigaarput, taakku Kalaallit Nunaata, Canadap aamma USA-p akornanni atajuartussanik attaveqatigiinnermik pilersitsinermik suliniuteqassapput, oqalliffimmi peqataasunut 200-t missaaniittunut taanna oqarpoq.

USA-mut timmisartukkut attavik
Inuussutissarsiornermut, Suliffeqarnermut, Niuernermut, Nukissiuuteqarnermullu Nunanut Allanut naalakkersuisup, ilaatigut Issittumi naalakkersuisut sinniisuinut saqqummiussivoq, Amerikap nunataanut timmisartumik attaveqalernissaq Nunatta naatsorsuutigigaa.

Atuaruk: Vittu ataatsimiititaliamit aggersarneqarpoq

- Ukiuni aggersuni timmisartumik attaveqaatitta pitsanngorsarneqarnerisigut, Canadamut imaluunniit USA-mut timmisartumik attaviit pilerseqqinneranni canadamiut amerikamiulluunniit angallassisartut atorlugit angalasinnaanissamut piffissaq apeqqutaaginnalerpoq. Siusinnerusukkut piguni pitsaanerussaaq, Vittus Qujaukitsoq oqarpoq, aporfiit timitallit piffissami sivisuallaami kalaallit, amerikamiut aamma canadamiut sivisuallaamik avissaaqqatissimagai naqissusiivoq.

Oqalugiaat tamaat uani atuaruk.

Powered by Labrador CMS