Pituffik
USA-mut isumaqatiginninniarnermi siunnersuut piumasaqaatitaqartoq
Amerikamiut sakkutooqarfeqarnerat Kalaallit Nunaat annertunerpaamik pissarsiaqaatiginissaa isumaqatigiissutip nutaap qulakkiissagaa, Naalakkersuisut aamma Inatsisartut ataatsimut piumasaqaatigaat.
Illersornissamut isumaqatigiissutip 1953-imeersup Kalaallit Nunaata amerikamiut Pituffimmi sakkutooqarfeqarneranni pissarsiaqaatigilluarnissaanut nukilaappallaarpoq.
Nunanut allanut tunngasunut naalakkersuisoq, Vittus Qujaukitsoq (S) aamma Nunanut Allanut Sillimaniarnermullu Ataatsimiititaliap ataatsimut oqaaseqaateqarnerminni tamanna naqissuserpaat.
Atuaruk: Pituffik pillugu politikkikkut inaarutaasumik suliaq
Nutaamik isumaqatiginninniartoqarneranut Kalaallit Nunaat toqqaannartumik ilanngunneqassasoq taammaammat piumasaraat, tamatuma nunap Pituffimmit iluanaaruteqaannarnissaa qulakkiissavaa.
- Taamaattumik Kalaallit Nunaata siumoortumik piumasaraa Pituffimmi kiffartuussinissamik isumaqatigiissummit aallaavilimmik niuernermut atasumik agguagarsiaqartaleqqinnissaq maangamut Kalaallit Nunaata pisarsimasai assigalugit, ataatsimut oqaaseqaateqarnermi tamanna allaqqavoq.
Oqaaseqaat ukiaq kingullermi Inatsisartuni aalajangernermut malitseritinneqarpoq, tassani Kalaallit Nunaata inuiaqatigiillu kalaallit amerikamiut Kalaallit Nunaanni sakkutooqarnerat annertunerpaamik pissarsiaqaatigalugulu iluaqutigisinnaanera qulakkeerniarlugu ataatsimoorussamik danskit/kalaallillu USA-mik isumaqatiginninniarnissaannik Naalakkersuisunik peqqusisumik, pisariaqassappallu ilassutitut isumaqatigiissusiornissamut imaluunniit Illersornissamut isumaqatigiissutip 1951-imeersup nutaamik isumaqatiginninniutigineqarnissaa.
Atuaruk: Pituffimmi kiffartuussinissamut isumaqatigiissummut nutaamut piffissaaruttoqalersoq
Naalakkersuisut ataatsimiititaliarlu taamaammat maanna piumasaqarput:
- Danskit naalakkersuisui Kalaallit Nunaanni amerikarmiut sakkutooqarnerata Kalaallit Nunaannut inuiaqatigiinnullu kalaallinut sapinngisamik annertunerpaamik pissarsiviullunilu iluaqutissarsiffiginissaa qularnaarniarlugu USA-mik ataatsimut danskit/nunatta isumaqatigiinniarnissaannik Kalaallit Nunaata kissaataanut nammaqatigiikkusunnermik, paasinninnermik akuersaarnermillu takutitsissasut.
Amerikamiut sakkutooqarfiata iluarsaanneqarnissaata kalaallinit akisussaaffigineqannginnissaata qulakkeerneqarnissaa tamatuma saniatigut piumasaqaatigineqarpoq.