nunarsuup kissatsikkiartornera
USA Canadalu silap pissusianut ataatsimut anguniagaqalersut
Nunat sanileriit marluk USA Canadalu, gas-inik kissatsinnartunik aniatitsinikinnerulernissamut ataatsimut anguniagassaminnik isumaqatigiissuteqarput
USA Canadalu silap pissusiata allanngoriartornera akiorniarlugu ataatsimut anguniagassaminnik isumaqatigiissuteqarput.
Nunat isumaqatigiissutigaat uuliamik gas-imillu suliffissuaqarfinnit metangas-imik aniatitsineq annikillisarniarlugu, silallu pissusianut isumaqatigiissut Parisimeersoq ´sapinngisamik piaarnerpaamik´ atsiorniarlugu, Det Hvide Hus taamatut nalunaaruteqarpoq.
Metangas
Nalunaarut tamanna saqqummiunneqarpoq canadap premierministeriata Justin Trudeaup amerikarmiullu præsidentiata Barack Obamap Det Ovale Værelsemi ataatsimiinnissaat sioqqullugu.
Nunat neriorsoqatigiipput metangas-imik, gas-it kissatsinnartut sakkortunersaannik, aniatitsineq annikillisarniarlugu.
Issittoq
Anguniagaavoq 2012-imi aniatitap 2025 nallertinnagu 40-45 procentimik annikillisinneqarnissaa, tamannalu peqatigalugu teknologiimik mingutsitsinngitsumik ineriartortitsineq siuarsarneqassalluni. Nunat isumaqarput suliniutimikkut Issittumi silap pissusiata allanngoriartornerata akiorniarneranut alloriaateqarlutik.
Apriilimi atsiorneqassaaq
Parisimi decembarimi ataatsimiinnermi nunarsuarmi nunat imminnut pisussaatipput nunarsuarmi tamarmi silap kissassusia 2 gradit sinnernagit qaffatsaaliiorniarlugu - periarfissaqarpat 1,5 gradiinnaassalluni. Nunat tamarmik gas-inik silap pissusianut ajoqutaasunik aniatitsinerup pakkersimaarnissaanut pilersaarutinik saqqummiussaqarput.
Silap pissusianut isumaqatigiissut nutaaq nunarsuarmi nunanit tamanit atsiorneqassaaq apriilimi New Yorkimi FN-ip persuarsiortitsilluni aaqqissinerani.