uran pillugu ataatsimiinneq
Uranitalinnik piiaanissamut paasissutissat nutaat
Narsami uranitalinnik piiaanissaq pillugu paasissutissat nutaat saqqummiunneqarnerat pissutaalluni isummanik mumisitsisinnaasoq Avatami siulittaasoq Mikkel Myrup oqarpoq
- Akunnerup naanerani Katuami ataatsimiititsinermi nutaanik paasissutissiisoqarnera ataatsimiinnermi tusarnaartunit peqataasuniillu tupaallaatigineqarpoq, Katuami arfininngornermi ataatsimiititsinermi aaqqissuisoq, Avatap siulittaasua Mikkel Myrup oqarpoq.
Uranitalinnik piiaanissamut isornartorsiuisumik ataatsimiititsineq ullumi marlunngornermi Christiansborgimi ingerlanneqaqqissaaq. Ataatsimiititsinerit Avatamit kiisalu pinngortitamik illersuisut Det Økologiske Råd, VedvarendeEnergi kiisalu avatangiisit pillugit illersuiniaqatigiit Noah ataatsimiititsinerni marlunni aaqqiissuisuupput.
- Uranitalinnik piiaanissamut naaggaarluinnarnerup atorunnaarsinneqarnera kukkunerusoq politikkerinit arlaqartunit isumaqarfigineqalerpoq, Mikkel Myrup Sermitsiaq.AG-mut oqarpoq.
- Christiansborgimi ataatsimiititsinermi paasissutissanik suli ilisimaneqanngitsunik saqqummiussisoqarumaartoq neriuutigaarput, Mikkel Myrup-ip Nuummit Københavniliannginnermini oqaatigaa.
Issittumi pilersaarusiarujussuit, tassa Kuannersuarni piiaanissat pillugit ataatsimiinnerni sammineqarput.
Piiaanerup qanoq avatangiisinut pinngortitamullu sunniuteqarsinnaanera ataatsimiissutigineqarpoq, CO2-mik aniasitsineq, innuttaasut peqqissusaat, akilersinnaasumik ingerlasinnaanersorlu ataatsimiissutigineqarlutik.
- Innuttaasut politikkerillu annikitsuinnarmik uranitalinnik piiaanissap kingunerisinnaasai pillugit ilisimasaqarput. Naalakkersuisut naaggaarluinnarnermik allanngortitsinerat amerlasuut tupigusuutigaat apeqquserlugulu, Mikkel Myrup oqarpoq.
Ilisimasallit nunanit allaneersut
Uranitalinnik piiaanermi qanoq sunniuteqarsinnaanersoq ilisimatuunit saqqummiussuunneqarput. Australiami meeqqanut nakorsaq Helen Caldicott ataatsimiinnermi pingaarnertut oqalugiartuuvoq. Taanna atomip nukinganik sakkussiaqarneq pillugu oqallissaarisuuvoq ukiuni 40-ni kingullerni, Physiciansb for Social Responsibility-mi præsidentiunikuulluni, Gandhip eqqissinissamut tunniuttagaani pissarsinikuulluni Nobelillu eqqissinissamut tunniuttagaanut piukkussatut taaneqarnikuulluni.
Hollandimeersoq seniorforskeri Jan Willem Storm DIIS-imilu aamma seniorforskeri Cindy Vestergaard uranitalinnik piiaanerup kingunerisinnaasai pillugit saqqummiissapput.
Sara Olsvig IA-meersoq sulinngiffeqarnini pissutigalugu paarlattaa Johan Lund Olsen peqataassaaq. Siumup Folketingimi ilaasortaatitaa Doris Jakobsen peqataassanngilaq.