aatsitassat
Uranimut siunnersuutit marluk akuerineqarnissaat qularnartoq
Steen Lyngep (A) aamma Inuit Ataqatigiit urani pillugu siunnersuutaannik aappassaanerinninneq ullumi tallimanngornermi pissaaq
Uranimik piiaaneq pillugu Inatsisartuni oqallittoqaqqissaaq.
Tassami ullumi tallimanngornermi Steen Lyngep (A) siunnersuutaa, uranimut qummut killiliisoqarnissaanik innuttaasut taasitinneqarnissaanut Inatsisartut aappassaaneerneqarnera oqallisigissavaat.
Aammalu paasititsiniaanerit illuinnaasiunngitsut aallarteqqullugit Naalakkersuisut peqquneqarnissaat pillugu Inatsisartut aalajangiiffigisassaattut kiisalu innuttaasunik taasititsisoqarnissaanut Inuit Ataqatigiit siunnersuutaat politikerit aappassaaniissavaat.
Atuaruk: Nuummi uranimut akerliussutsimik takutitseqqittoqalersoq
Siunnersuummi kisimiittoq
Steen Lynge siunnersuummini kisimiippoq, tassami partiia Atassut, siunnersuutip apriilimi siullermeerneqarnerani itigartitsereerpoq. Aammalu Inuit Ataqatigiit siunnersuutip aappassaaneerneqarnerani akuersinissaminnut pilersaaruteqanngillat, partiip siunnersuut ilaatigut isumaqatiginnginnamiuk.
Inuit Ataqatigiit siunnersuutaat aamma Inatsisartunit amerlanerussuteqartunit siullermeerneqarnerani itigartinneqarpoq. Partiit naakakkersuisoqatigiit, Siumut, Demokraatit aamma Atassut, siunnersuummik itigartitsinissaminnut taasinissartik allanngortinngilaat.
Atuaruk: ‘Narsaq tassaasariaqanngilaq qinngornernik ulorianartunik eqqaaviusoq’