Uranimut akuersaanngilluinnarneq allanngortinneqarpoq

Nalunaaqutaq 18:45-p missaani uranimut akuersaanngilluinnarneq Inatsisartuni allanngortinneqarpoq.

Tamanna 15-init akuerineqarpoq. Inuit Ataqatigiit, Demokraatit, Partii Inuit kiisalu Hans Enoksen isumaqataanatik taasipput.

Ukiuni 25-ni uranimut akuersaanngilluinnarnermut inatsit taamaasilluni atorunnaarsinneqarpoq, tamannalu akunnerni tallimani Inatsisartuni oqallisigineqareerluni taasissutigineqarluni. Taamaasilluni suliffeqarfiit uranitalinnik piiaaniarlutik qinnuteqartussat Naalakkersuisunit nalilersorneqarsinnaalissapput Kalaallit Nunaanni uranitalinnik piiaasinnaanermut akuersissummik tunineqassanersut.

Ikinnerussuteqarlutik itigartitsillutik taasisut Inuit Ataqatigiit Demokraatillu taasinissaq kingusinnerusukkut pisinnaanersoq taasissutigigaluarpaat, tassani inuiaqatigiinni uran pillugu taasisoqartariaqartoq oqaatigalugu. Inatsisartunili amerlanerussuteqartut taasinermi itigartinneqarpoq.

Allannguutissatut siunersuummi 15-it akuersinatik taasipput 13-illu akuersillutik taasillutik. Ataaseq taaseqataanngilaq.

- Inuit atugarliortut akitsuutit amerliartortut, kiisalu aningaasaqarnerput uninngasoq inuuffigiinnarsinnaanngilarput. Taamaattumik uranimut akuersaanngilluinnarnerup allanngortinneqarnissaa pisariaqarpoq, naalakkersuisut siulittaasuat Aleqa Hammond, Siumut, oqarpoq.