aatsitassat

Uranimik piiaaqqusivinnginnerup eqquteqqinneqarnissaa siunnersuutigigaa

Urani pillugu Aqqaluaq B. Egedep (IA) aalajangiiffigisassatut siunnersuutaata aappassaaneerneqarnera ullumikkut Inatsisartuni pissaaq

IA siulittaasua Sara Olsvig, Naaja H. Nathanielsen, Per Rosing-Petersen aamma Peter Olsen peqatigalugit Aqqaluaq B. Egedep urani pillugu siunnersuutaanut allannguutissamik siunnersuuteqarput

- Narsaq tassaasariaqanngilaq qinngornernik ulorianartunik eqqaaviusoq.

Aqqaluaq B. Egedep (IA) Inatsisartunut siunnersuutaa taama nipeqarpoq. Siunnersuutaata aappassaaneerneqarnera ullumi marlunngornermi pissaaq. Siullermeerneqarnera qaammatip aallartinnerani pivoq.

Siunnersuut siullermeerneqarmat tupaallaataanngitsumik Inatsisartut marlunnut avipput. Naalakkersuisoqatigiit uranimut akuersaartut itigartitsipput, partiillu illuatungiliuttut akuersillutik.

Atuaruk: ‘Narsaq tassaasariaqanngilaq qinngornernik ulorianartunik eqqaaviusoq’

Piiaaqqusivinnginnermik eqqussineq
Ullumikkut siunnersuummik aappassaaneerinnittoqarnerani Naaja H. Nathanielsen, attaviitsoq, Per Rosing-Petersen, Partii Naleraq kiisalu Sara Olsvig aamma Peter Olsen, Inuit Ataqatigiit allannguutissatut siunnersuuteqarput.

Taakku siunnersuutigaat uranimik attueqqusiunnaavinneq Nunatsinni eqqunneqaqqissasoq.

- Siunnersuut siulleq tunngaviatigut uranisiornissamut akerliunermik tunngaveqarpoq. Tamanna uranisiornermi aatsitassanik qinngornilinnik attuilluinnanngeqqusinerup atuutsileqqinneqarnissaanik kissaateqartuniit aallaveqarpoq. Tamanna isumaqatigaarput, taamaattumillu siunnersuutip tunngaviusumik apeqqummut tassunga tunngasuusariaqarneranik isumaqarluta. Taamaattumillu allannguutissatut siunnersuut manna saqqummiupparput, politikerit sisamat allannguutissatut siunnersuummi allapput.

Naalakkersuisoqatigiit taasititsinissamut akuersinngitsut
Partiit illuatungiliuttut tamanna pillugu taasititsiniarsarigaluarput. Kisianni naalakkersuisoqatigiit aalajangiinertik attatiinnarpaat, taasititsinissamullu siunnersuut itigartillugu.

- Naaperiaatissatulli siunnersuut tamanna naalakkersuisooqatigiinniit akerliuffigineqartuarsimavoq. Aatsitassanik qinngornilinnik attuilluinnanngeqqusinermut siunnersuut saqqummiupparput, massa amerlanerussuteqarsinnaanaviarnata ilisimagaluarlutigu.

Atuaruk: Uranimut siunnersuutit marluk akuerineqarnissaat qularnartoq

Amerlanerit sunnerneqassanngitsut
Taakku erseqqissarpaat, aatsitassarsiornerup tungaatigut ineriartortoqarnissaa kissaatigigitsik.

- Ingerlassat taakkua amerlanersaat allannguutissatut siunnersuummit matumannga attorneqassanngillat. Ingerlassarmi ataasiinnaq attorneqassaaq. Taamaattumillu Kalaallit Nunaanni aatsitassarsiornermik ineriartortitsineq siunnersuummit uannga unitsinneqassanngilaq, Naaja H. Nathanielsen, Per Rosing-Petersen, Sara Olsvig aamma Peter Olsen allapput.

Atuaruk: KNR-imi tusagassiortoq uranimut isorinnittoq soraarsikkaat

Powered by Labrador CMS