aatsitassat

Uranimik isumaqatigiissut saqqummiunneqarpoq - Uani atuaruk

Isumaqatigiissummi maanna kikkunnit tamanit atuarneqarsinnaalertumi, uranip isumannaatsuutinneqarnissaanut tunngatillugu Danmarki oqartussaasuunerpaasoq atuarneqarsinnaavoq

Demonstration, uran, 1. maj 2015, Narsaq, Uran Naamik
Narsami uranisiornissamut akerliussutsimik takutitsineq

Kalaallit Nunaannit urani avammut niuerutigineqartarnissaanut akisussaaffimmut tunngatillugu, Københavnimi inuussutissarsiornermut aqutsisoqarfik oqartussaasuunerpaanngorpoq.

Urani pillugu isumaqatigiissutip saqqummiunneqaqqammersup tamanna uppernarsisippaa, taanna Kalaallit Nunaata aamma Danmarkip januaarimi isumaqatigiissut atsiorpaat.

Atuaruk: Danmarkip Nunattalu uranimik avammut niuernissaq isumaqatigiissutigaat

Naak Nunatta aatsitassanik piaaneq akisussaaffigigaluaraa, Danmarki isumannaallisaanermut tunngasunut tamanut aalajangiisuusassasoq isumaqatigiissummi atuarneqarsinnaavoq. Sermitsiaq.AG-mi atuaasartut nammineerlutik PDF-fil allaaserisap talerpiata tungaaniittoq aasinnaavaat.

Nalunaarusiaq isertuunneqartoq
Inuussutissarsiornermut, Niuernermut aamma Suliffeqarnermut Naalakkersuisoqarfik Nuummiittoq urani pillugu tusarniaavigineqartassaaq, isumaqatigiissummi aamma tamanna allaqqavoq.

Kalaallit Nunaata aamma Danmarkip akornanni akisussaaffiit agguataarneqarnerat januaarip 19-ni isumaqatigiissutigineqarsimasup saqqummiunneqarnerata kingorna, IA-meersumit Aaja Chemnitz Larsenimit isumaqatigiissutit oqaaseqaataanik isertuussisoqarnera isornartorsiorneqarnikuuvoq.

Suliffeqarfik uranisiorniarluni ilaatigut pilersaaruteqartoq, Greenland Minerals and Energy, isumaqatigiissut atsiorneqarmalli, taamatullu najoqqutassaasussanut alloriarneq siulleq atsiorneqarmat aningaasatigut iluatsitsillualersimavoq.

Atuaruk: Uranimik isumaqatigiissutip kingorna GME-p aktiaatimi nalinga qaffatsippaa

Nutaamik isumaqatigiittoqareeraluartorluunniit, aatsaat ukiut qulit tikillugit qaangiuppata, Kalaallit Nunaat uranimik avammut niuersinnaalissasoq, ilisimatuup Cindy Vestergaardip nalilernikuuaa.

Atuaruk: Uranitalinnik tunisassiornissaq imaaliallaannaq pinavianngitsoq

Powered by Labrador CMS