aatsitassat
Urani pillugu paasititsiniaanerit ullumi aallartissapput
Sisimiunu, Ilulissani, Uummannami, Aasiaanni Kangerlussuarmilu paasititsiniaanerit ullumi aallartissapput. Paasititsiniaanermi immiussisoqassaaq KNR TV-ikkullu takutinneqarumaarlutik
Geusimit aamma DCE-mit ilisimatuut pingasut, Namminersorlutik Oqartussanut attuumassuteqanngitsutut pinngoqqaatinik radioaktiviusunik atuinermi ujarassiornermi aamma avatangiisinut sunniutinut tunngasunik siunnersuisartutut suleqatigineqartut Sisimiunut, Ilulissanut, Uummannamut, Aasiannut Kangerlussuarmullu paasisitsiniaajartorlutik angalalerput. Uranimik misissuinermik aamma piiaanermik paasisitsiniaanerit junip 16-anniit 20-annut ingerlanneqassapput.
Saqqummiussisussat suliffeqarfinnit attuumassuteqaratik siunnersuisarnermik ingerlataqarfinneersuupput, tassaasut Danmarkimi Kalaallit Nunaannilu ujarassiuutut misissuisarfimmeersut (Geus) aamma Aarhus Universitetemi (DCE), Danmarkimi avatangiisinut nukissiornermilu misissuisoqarfimmeersut. Ilisimatuullu ukiuni arlalinni suliaminni misilittagaqarluartuupput, ukuullutillu:
- Naalagaaffimmi ujarassiuutut soraarneq, Leif Thorning, Geus
- Siunnersortaaneq, ujarassiooq Per Kalvig, Geus
- Avatangiisit kemiiat pillugu ilisimatooq, Gert Asmund, DCE, Aarhus Universitet
Politikkikkut attuumassuteqanngitsut
Uranimik akuersaanngilluinnarnissamik politikki Inatsisartuni 2013-imi ukiakkut atorunnaarsinneqarpoq, taamaattumillu urani pillugu paasisitsiniaanerit pisariaqartinneqalerput, Naalakkersuisut isumaqarput,
- Paasisitsiniaaneq uranimut akerliunermik akerliunnginnermulluunniit tunngatinneqanngilaq aamma politikkerinit peqataaffigineqassanngilaq, kisianni illoqarfinni tikinneqartussani urani pillugu aamma uranimik piiaanerup kingunerisinnaasai pillugit paasisitsiniaalluni saqqummiussisoqartassaaq. Inuussutisarsiornermut Aatsitassanullu Naalakkersuisoq Jens-Erik Kirkegaard aamma Pinngortitamut Avatangiisinullu Naalakkersuisoq Kim Kielsen paasisitsiniaasoqarnissaanut suliakkiisuupput.
KNRimi tusagassiortoq aamma assiliisoq urani pillugu paasisitsiniaaffiit ilaannit filmeliussapput. Sisimiuni, Ilulissani aamma Kangerlussuarmi paasisitsiniaalluni ataatsimiisitsinerit pillugit tv-ikkut aallakaatitassiussallutik. Naatsorsuutigineqarpoq aallakaatitassiat ukiamut takutinneqartumaartut.
Nunap sinnerani kingusinnerusukkut paasisitsiniaasoqarnissaa pilersaarutaavoq.
Naalakkersuisut.gl –imi urani pillugu paasissutissat saqqummersitallu katersat qupperneqarput. Paasisitsiniaalluni angalasoqareerpat saqqummiunneqarsimasut pillugit quppernermik nutaamik pilersitsisoqarumaarpoq.