oqallinneq
Urani pillugu innuttaasunik ataatsimiititsineq
Nutaarsiassaqartitsivik Sermitsiaq.AG sammisaq pingaarutilik pillugu innuttaasunik ataatsimiititsiniarpoq, kikkut tamarmik paasisanik annertunerusunik tunngaveqarlutik suliniummut isummersinnaaqqullugit
Maanna isorinnittut selskabilu ammasumik oqallissinnaalerput, tamatumani piviusut misiligarneqassallutik.
Tassa Nutaarsiassaqartitsivik Sermitsiaq.AG sammisaq pingaarutilik pillugu innuttaasunik ataatsimiititsiniarpoq. Kikkut tamarmik paasisanik annertunerusunik tunngaveqarlutik suliniummut isummersinnaaqqullugit.
Greenland Minerals and Energyp pisortaa australiamiu John Mair, Kalaallit Nunaata nutaajunerusumik oqaluttuarisaanerani apeqqutit annersaasa ilaat, tassa Kalaallit Nunaat uranimik avammut tuniniaasalissanersoq, pillugu soqutiginnittunik, alapernaasertunik isorinnittunillu ammasumik oqallinnermut peqataanissaminut akuersisimavoq.
Panelimissaaq paasisimasalittut peqataassaaq Nunamineralsip pisortaa Ole Christiansen, taassumalu eqqartornerussavaa Kalaallit Nunaanni aatsitassarsiorneq, imaluunniit suli aatsitassarsiulersimannginneq, aammalu malinnaanngittoqarsimanersoq.
Maannakkorpiaq Tunup Avannaani Citronenfjordimi aatsitassanik suliniut nutaaq ingerlanneqarpoq, apeqqutaavorli Kalaallit Nunaata sinnerata suliniut taanna qanoq annertutigisumik pissarsiffigissaneraa. Manna tikillugu tamaani ujaasineq Norgep Islandillu pissarsiffiginerpaasimavaat. NGO-nit tusagaqarpiarsimanngilagut zinkimik tunisassiornermi, Maarmorilimmit ilisimaneqartumit, avatangiisitigut kinguneqaatissanik.
Kiisalu SIK aatsitassarsiornermik suliniutini kalaallit sulisartut sulisartunit nunat allamiunit salliunneqarnissaannik piumasaqarpoq.