Uppernarsaatit amingaatigineqartut pissutigalugit SAR qulimiguulik uninngatinneqartoq

2015-mi Air Greenland S-61-mik qulimiguulimmik pisivoq, taanna Irlandimi sinerissamik nakkutilliisunit annaassiniartarnermut ujaasisarnermullu atorneqartarsimavoq.

Air Greenlandip SAR-imut, tassa annaassiniartarnermut ujaasisarnermullu isumaginnittussanngorluni isumaqatigiissuteqarnerminut atatillugu tamanna pivoq.

Qulimiguulillu atuutinneqalernissaanut assigiinngitsunik ajornartorsiuteqarfigineqarpoq.

Ullaap tungaani KNR-ip qulimiguulik suli piareerneqarsimanngitsoq allaaserereeraallu, Autopilotillu atortuisa ilaannut uppernarsaatit pissarsiarinissaat ajornartorsiutitaqarmat, qulimiguulik pisiarineqarsimasoq uninngatinneqartoq, Air Greenlandip tusagassiuutinut nalunaaruteqarluni oqaluttuaraa.

Aamma atuaruk: SAR qulimiguulik uninngasoq

Piareersaaneq 2016 marsip qaammataani aallartippoq.

- Piareersaanermik suliaq unitsinneqarallarnikuuvoq, autopilotip atortuisa ilaannut uppernarsaatit pissarsiarinissaat ajornartorsiutitaqarmat, tamannalu qulimiguullip nalunaarsorneqarsinnaanissaanut piumasaqaataavoq. Tamanna inissinneqareerpat suliaq ingerlateqqineqarsinnaalissaaq, Air Greenland allappoq.

Air Greenlandillu pisortaanerata, Michael Højgaardip, qulimiguulik OY-HUF-mik ilisarnaatilik ajornartorsiutitaasa aaqqipallanneqarsinnaanerat qanittumi piumaaartoq neriuutigaa.

- OY-HUFip kinguaattoorneranik pisoq uggornarpoq, kisianni unammilligassanut aaqqiissutissat qanittukkut piareernissaat naatsorsuutigineqarpoq, taanna tusagassiuutinut nalunaarummi oqarpoq.

OY-HUFi 16,9 mio. koruunik nalilittut naatsorsuutinut ilanngunneqarpoq.