Aalisarneq

Upernaviup pigisaani suleqatigiinnissamik nukittorsaaneq

Royal Greenland, KNAPK aamma SIK Upernaviup nunaqarfii tamaasa tikeraarpai

Upernavimmut angalasuupput, saamerlermit: ønnes Berthelsen, KNAPK-mi pisortap tullia, Jens K. Lyberth, Royal Greenlandimi avammut attaveqarnermut HR-imullu pisortaq, Estrella Thomsen, SIK-p siulittaasuata Jess G. Berthelsenip allattaa, Henrik Sandgreen, KNAPK-p siulittaasua aamma Ludvig Larsen, SIK-p siulersuisuunerinut ilaasortaq. Mikael Tinghuus, Royal Greenlandip pisortaanera, aamma Lars Nielsen, Royal Greenlandimi tunisassiornermut pisortaq, angalaqataasut, assimi ilaanngillat

Aalisarnerup tungaatigut Upernaviup pigisaanni suleqatigiinneq pitsaanerulersinniarlugu Royal Greenland, KNAPK aamma SIK nunaqarfinni paasisassarsiorlutik angalapput ulluni makkunani.

Royal Greenlandip Upernaviup pigisaani tunisassiorfiutaanut arfineq pingasunut annertuumik unammilligassaqarpoq, tunisassiorfiillu arlallit aasap ingerlanerani matoqqasimapput, ilaatigu qerititsiviit aalisakkanik qerisunik ulikkaarluinnarsimammat.

Sikusarnera
Tamanna pingaartumik ukiuunerani sikuusima- nerujussuanik pissuteqarpoq, taamaalillunimi qerititsiviit ulikkaaqqasut imaarnissaat Royal Arctic Linemut ajornarsimavoq. Avannaani aalisartorpassuit kisimik ajornartorsiummit eqqugaanngillat.

Tunisassiorfinni sulisartorpassuit aamma suliffissanik taamalu aamma isertitassanik annaasarput, tamannalu nunaqarfinni inuuniarnikkut atugassarititaasut ajorseriarnerannik kinguneqarluni.

Aalisarnerup qaleralinnillu tunisinerup iluanni ajornartorsiutit ukiorpassuit ingerlaneranni oqaluuserineqartarsimapput. Taamaattumik Royal Greenlandip, KNAPK-p aamma SIK-p, Upernaviup pigisaanik nunaqarfinnik tamanik takuniaaqqammersut, akornanni suleqatigiinnermik patajaatsumik pilersitsinissaq pingaaruteqarpoq.

Nunaqarfinni pissutsit pitsaanerit
Jens K. Lyberth, Royal Greenlandimi avammut attaveqarnermut sulisoqarnermullu pisortaq, oqarpoq, suliffeqarfik tunisassiorfinni sulisunut aalisartunullu pissutsinik pitsaanerusunik pilersitsiniarsarisoq.

- Tunisinermut tunisassiornermullu sinaakkutissanik pitsaanerusunik pilersitsinissamik siunertarput piviusunngussapput immikkoortut tamarmik akornanni suleqatigiinnermik annerusumik piler- sitsinissaq pingaaruteqartorujussuuvoq. Nunaqarfinni innuttaasut naapeqatigissavavut, taamaattumik neriuutigaara angalaneq tamanna siunissami tamanut pissutsinik pitsaanerusunik pilersitsissasoq, oqarpoq.

Angalasoqassaaq
Royal Greenland nuna tamakkerlugu aalisakka- nik tunisassiorfiuteqartoq 40-t sinneqartunik.

Henrik Sandgreen, aalisartut piniartullu kattuffiannut, KNAPK-mut, siulittaasoq, oqarpoq, Upernaviup nunaqarfiini aalisartut piniartullu peqatigiiffiisa KNAPK-llu akornanni suleqatigiinneq tikeraarnermi nukittorsarneqartussaasoq, nunaqarfinnilu aalisarnerup iluani ajornartorsiutit pitsaanerusumik takuneqarsinnaalernissaannik nuannaarutiginnilluni.

- Nunaqarfinni tunisinerup aalisarnerullu sapinngisamik akornusersorneqanngitsumik ingerlanneqarnissaat qulakkeertariaqariaparput. Nunaqarfinni aalisartut piniartullu peqatigiiffiinut ilaasortat nalinginnaasumik ilungersunartunik atugassaqartitaanerat nassuerutigaarput. Taamaattumik aalisarnermik inuussutissarsiuteqarnerup iluani attuumassuteqartut tamarmik akornanni suleqatigiinnermik aaqqissuussaasumik pilersitsinissarput avaqqunneqarsinnaanngilaq, oqarpoq.

Estrella Thomsen, SIK-p siulittaasuata Jess G. Berthelsenip allattaa, oqarpoq, nunaqarfinni tunisassiorfinni sulisartorpassuit, tunisinerup unitsinneqartarnera pissutigalugu piffissani sivisuuni isertitaminnik annaasaqartartut, sulinermi atugassarititaasunik pitsaanerusunik qulakkeerunneqassasut.

- Ilaasortavut ilungersunartorujussuarnik atugassaqartitaapput, tamannalu ilaqutariit aningaasaqarnikkut soorunami eqqugaassutigisarpaat. Aalisakkanik tunisassiorfiit matugaangata piniartukkormiuni aalisartukkormiunilu nuliaasup aappaasulluunniit aningaasaqarnikkut akisussaaffimmik annertuumik tigummiaqartarnera ilisimaaraarput, oqarpoq.

Angalaqataasut
Sinniisut aallaqqaammut tallimanngornermi Kullorsuarmut Nuussuarmullu aallarput, angalanerlu Upernavik Kujallermut ingerlaqqilluni, arfininngornermi Kangersuatsiamut, Nutaarmiut, Tasiusaq, Innaarsuit kiisalu Aappilattoq ataasinngornermi orninneqartut.

Upernaviup pigisaani ajornartorsiutaasunik qaangiiniarnermi angalasut assilineqarput.

Royal Greenlandip pisortaanera Mikael Thinghuus, aamma suliffeqarfissuarmit Lars Nielsen peqataapputtaaq.

Powered by Labrador CMS