Aalisarneq

Upernaviup eqqaani saattuarniarneq iluatsilluartoq

Saattuarniarnermi aqutsiveqarfimmi Upernavimmi ukioq manna pisarineqartut siornamut sanilliullugu 80 procenti missarluinnaani qaffariaateqarput.

Krabbefiskeri, krabber, Sisimiut

Upernaviup eqqaani saattuarniarneq iluatsilluarpoq.

Ukiunimi kingullerni saattuarniarneq malunaatilimmik amerleriaateqarfiusimavoq

Siorna aqutsiveqarfimmi Upernavimmi saattuanik pisaassiissutit tunniunneqartut 200 tonsiupput, taakkunanngalu tonsi ataasiinnaq pisarineqarsimavoq. Ukioq mannali pisat annertuserujussuarsimapput pissaassiissutigineqartunit 225 tonsiusunit 183 tonsit pisarineqarsimammata.

Royal Greenland nittartakkamini allaaserinnippoq.

Ukioq manna saattuanik pisassiissutit aqutsiveqarfimmi Upernavimmi pisassiissutigineqartut 225 tonsiusunit 81 procentii pisarineqarput. Pisarineqarsimasunillu 70 tonsit missaanniittut saattuarniummit Jaaku-Malimmit Qeqertarsuarmi Royal Greenlandip tunisassiorfianut tunineqarput.

Nunatta sineriaani saattuarniarnermi aqutsiveqarfiit tamakkerlugit ukioq manna saattuanik 2.900 tonsik pisassiissutigineqarput, taakkunannga 2.320 tonsit novembari naanngitsoq pisarineqarput, Royal Greenlandip ilanngullugu paasissutissiaraa.

- 2.320 tonsi pisarineqartunit 1.378 tonsit Royal Greenlandip tunisassiorfiinut tunineqarput. Siorna 3.150 tonsit pisassiissutigineqarmata 2.190 tonsit pisarineqarsimapput, suliffeqarfik paasissutissiivoq.

Saattuarniarnermi aqutsiveqarfimmi Nuuk – Paamiuni pisassiissutigineqartut 1.200 tonsiusut tamarmik pisarineqarmata ullumi decembarip aallaqqaataani saattuarniarnerat unitsinneqartoq Aalisarnermut Piniarnermut Naalakkersuisoqarfimmit nalunaarutigineqarpoq.

Powered by Labrador CMS