angallassineq
Upernavimmi pilluarnerpaavunga
Ullut aqqanillit kinguaattoorussaareeerluni kiisami angallanneqarpoq
Upernaviup nunaqarfiani Kullorsuarmi decembarip arfernanili aallartussaagaluit kinguaattoornermi eqqungaasut arlaqarput. Ippassarlu qulimiiguuliup tikikkiartorluni nipaa ersermat angalasussat oqiliallapput, Upernavimmumi ingerlanneqariaannanngoramik.
- Maannakkut Upernavimmiittuni pilluarnerpaavunga, ilaasut ilaat Norgemiu Vilhelm Berthelsen oqaluttuarpoq. Taanna Norgemut apuutinngitsuussasoraluni ernumaleraluarsimavoq.
Silarlunneranit timmisartulluunniit teknikkikkut ajoquteqarneranit angalasussat 94-t sivittajaamik kinguaattoorussaapput.
- Maanga suliartuinnarnikuugama pilesaarutaasoq malillugu aallarnissara ilimagisimagaluarpara. Ullunilu qulini kinguaattooqqaninni ullut tamaasa neriuttaraluarpunga kiisami aallassallunga, pakatsiinnartarsimallungali, Vilhelm Berthelsen ippassaq mailikkut allappoq.
- Aallartussani kisiartaallunga maani kinguaattoorussaanngilanga, Kullorsuarmukartummi Kullorsuarmiillu aallartussat eqqugaasut aamma arlaqarpugut.
Air Greenlandip Issittumi sakkutooqarfik tallimanngormat piumaffigaa qulimiguulik S61 ujarlernermi atorneqartartoq Upernaviup eqqaani angallannermi kinguaattoorussaasunut ikiuussinnaanersoq. Kinguaattoortoqarneralu "immikkuullarilluinnartutut" isigineqarmat ikioqquneq Issittumi sakkutooqarfiup akueraa. Qulimiguulillu Sikorskyen ilaasunut 19-nut inissalik arfininngormat angallassilluni ikiuulluni.
- Upernaviup eqqaani qulimiguulimmik angallassineq ippassaq arfininngornermi akornutitaqanngitsumik naammassineqarpoq, Air Greenland tusagassiuutinut nalunaarummi allappoq.
- Ilaasullu amerlanngitsut ataasinngorpat apuuffissaminnut ingerlaqqissapput. Taakku kujataalairtussamut ilaasussaassallutik, Air Greenlandip timmisartuussinermik paasissutissiissutaani allassimavoq.
Atuaruk: Air Greenland: Kiffartuussinissamut isumaqatigiissutit suli atsiorneqanngillat
Kinguaattoorussaasut ilaat Vilhelm Berthelsen utaqqisitaangaatsiareeraluarluni suli neriuuteqarpoq.
- Ataasinngorpat ingerlaqqikkutta marlunngorpat Norgemut apuunnissara neriuutigaara, taanna Upernavimmit allappoq. Internetsimut aqqut arriippallaarmat taanna assinik nassiussisinnaasimanngilaq.