Upernavimmi "kuulteqarfimmi" tunisassiorneq suli annertusiartortoq

- Upernavimmi nunaqarfiinilu tamani annerusumilli Nutaarmiuni, Tasiusami Innaarsunnilu tunisassiarineqartartut annertuseriasssasut ilimagaarput, nunaqarfiimmi taaneqartut eqqaat aalisarfissuummata, taakkualu najugaqartunit "kuulteqarfik"-mik taaneqartarput, Upernavimmi tunisassiorfimmi ingerlatsisoq Flemming Andersen Royal Greenlandip atuagassiaanut Navigatiomut saqqummeqqammersumut oqarpoq. Tamanna suliffeqarfissuup nittartagaani allaaserisami atuarneqarsinnaavoq.

2014-imi tunisassiat ukiup siuliani tunisassianut sanilliullugit 200 tonsinik annertusipput. Tunisassiorneq ingerlalluartoq 2015-imi ingerlalluaannassangatinneqarpoq, suliffissuup pisortaa paasissutissiivoq.

- Taamatuttaaq aalisartut piffissaq tunisiffigisinnaasaat sivitsorneqartussaanera taamaalisukkullu pisassiissutit 1500 tonsinik annertusineqarnerat pissutigalugit ukioq manna tunisassiorluartoqassasoq ilimagilluinnarpara, tunisassiorfiup pisortaa Flemming Andersen Royal Greenlandip nittartagaa naapertorlugu oqarpoq.

Upernavimmi nunaqarfiinilu tunisassiornerit ingerlalluarnerisa saniatigut Upernavimmi pigisaanilu tunitsivinnik qerititsivinnillu alliliisoqarnissaanut pilersaarusiortoqarpoq, tamannalu ilutigalugu Upernavik Seafoodip tunisassiorfiutigisimasai Royal Greenlandip pisiarisimammagit Flemming Andersenip naammagisimaarpaa.

- Tunisassiorfiit pisiareqqammernerisa kingorna ernumaqqaalaarsimavugut, tigunerili nuannersunik tamatsinnit misigisaqarfiupput. Aalisarneq tunisassiornerlu ineriartorluarpoq, Upernavimmilu pigisaanilu aalisarnerup ineriartortinneqarnissaanut pilersaarusiortoqareerpoq. Sulisut attavigissaarluarnerulersimapput, tamatumani paasissutisseeriaaseq siornatigumut sanilliullugu pitsaanerulersimalluni. Taamatuttaaq aalisartut tunisisinnaanerup sivitsorneqartussaanera Royal Greenlandimilu aalisarnermut siunnersortinut attassuteqarsinnaanertik pillugit naammagisimaarinnippasipput, Flemming Andersen nittartagaq naapertorlugu oqarpoq.