Wednesday, January 10, 2018 - 13:09

Upernavimmi eqqaanilu juullimili angalaqqinnaveertut

Assi.: Leiff Josefsen
Air Greenland decembarimili silarlussiorlunilu teknikkikkut annertuumik ajornartorsiuteqalerpoq, tamannalu Upernavimmiit tassungalu juullikkunni angalasunut kinguneqartitsivoq.

Air Greenland juullikkunnili Upernavimmi eqqaanilu unammillernartunik aqqusaagaqaqattaarpoq.

Ajornerpaamik eqqugaasut
Decembarimi silarlunnera aamma januaarimi qulimiguullip teknikkikkut ajoquteqarnera ajornartorsiornermut pissutaapput.

- Upernaviup, Nuussuup aamma Kullorsuup akornanni timmisartuussinerit ajornerpaamik eqqugaaqqapput, Air Greenlandip attaveqaqatigiinnermut pisortaa, Katrine Hjelholt Nathanielsen, Sermitsaq.AG-mut ilisimatitsivoq.

Tassani ilaasut Upernavimmut imaluunniit tassanngaanniik aallarnissartik utaqqivaat.

Upernaviup aamma nunaqarfiit Innaarsuit, Tasiusaq, Aapilattoq, Kangersuatsiaq aamma Upernavik Kujalleq akornanni ilaasut apuunniarlutik utaqqisut 36-iupput, Air Greenlandip attaveqaqatigiinnermut pisortaa nalunaaruteqarpoq.

Sapaatip-akunnerata naanerani aatsaat apuutissasut
- Qulimiguulik ullumi, pingasunngornermi, aamma sapaatip-akunnerata sinnerani timminissaa pilersaarutaavoq, kingorna ilaasut apuuffissaminnut apuutissallutik, Katrine Hjelholt Nathanielsen oqarpoq.

Seneste nyheder / Nutaarsiassat kingulliit