upernaakkut ataatsimiinneq
Upernaakkut ataatsimiinnissamut IA 35-nik siunnersuuteqarpoq
Upernaakkut ataatsimiinnerup qaammatip tulliani aallartinnissaanut IA siunnersuutinik oqallisissianillu katillugit 35-nik nassiussivoq
Tusagassiorfinnut nalunaarut naapertorlugu Inuit Ataqatigiit qaammammi tullermi upernaakkut ataatsimiinnissamut piareersimapput, partii malillugu oqaluuserisassanik inuiaqatigiinnut pingaarutilinnik, katillugit immikkoortunik 35-nik nassiussaqarsimalluni.
– Inuit Ataqatigiit ilaatigut oqaluuseritikkusuppaat inuit pisinnaatitaaffii, NGO-t inuiaqatigiinnut pingaaruteqassusiat, ataatsimut pisuussutitta tamanut pitsaanerpaamik ingerlanneqarnissaat, aanngajaarnartunik atuinerup akiorneqarnissaa aammalu napparsimasut nunani allani katsorsarneqartillutik pisinnaatitaaffii, Inuit Ataqatigiit Inatsisartuni gruppiata siulittaasua Agathe Fontain tusagassiorfinnut nalunaarummi allappoq.
iA-p Naalakkersuisut ilaatigut kajumissaarniarpai sammisaqarfinni soorlu kommuninut naligiissaarinermi, aatsitassanut periusissami, inuussutissarsiutit ineriartortinneranni kiisalu Pituffimmut tunngasumi innuttaasut partiillu allat isumasioqatigisaqqullugit.
– Inatsisartut upernaakkut ataatsimiinnissaat Inuit Ataqatigiinni qilanaaraarput. Qilanaarpaarput partiit allat naapinnissaat, ataatismoorlutalu inuiaqatigiinnut pitsanngorsanut aqqutissanik nutaanik nassaarniarnissarput. Partiit assigiinngillat, anguniagarli ataasiusariaqarpoq: sapinngisamik siammasinnerpaamik tapersersorneqarluni angusaqarnissap sammineqarnissaa. Taamaattumik Inuit Ataqatigiinni ammasumik oqaloqatigiinnissamut naaperiarfissarsiornissamullu piareersimavugut, Agathe Fontain tusagassiorfinnut nalunaarutikkut allappoq.
2015-imi upernaakkut ataatsimiinneq aallartissaaq tallimanngornermi marsip 6-anni.