uddannelse & rådgivning
Upalungaarsimanissaq pillugu Qallunaat Nunaannik isumaqatigiissut nutaaq
Namminersorlutik Oqartussat oqartussaasullu allat siunissami qallunaat upalungaarsimatitaannit ilinniartinneqarlutillu siunnersorneqarsinnaanermut periarfissaqalissapput
Illersornissamut ministeri Peter Christensen (V) septembarip aallaqqaataata tungaanut nunatsinnut tikeraarpoq, tikeraarnermilu upalungaarsimanermut isumaqatigiissut nutaaq oqaluuserineqartunut ilaavoq.
Beredskabsstyrelsi naapertorlugu oqartussaasut siunissami illersornissaqarfimmit ilaatigut ilinniartitaanikkut siunnersuinikkullu ikiorserneqarnissamik periarfissaqarnerulissapput.
Akuutissanik maqisoorneq
Ullunilu tullerni illersornissamik ministeri Pinngortitamut, Avatangiisinut Nukissiornermullu Naalakkersuisoqarfimmik upalungaarsimaneq pillugu isumaqatigiissummik nutaamik atsioqateqassaaq.
Isumaqatigiissut aqqutigalugu annaassiniarnermik suliallit Beredsskabsstyrelsip pikkorissartitsisarnerini peqataasinnaalernerat ammaanneqassaaq, soorluttaaq annaassiniarnermik suliallit tassanngaannaq assersuutigalugu akuutissanik navianartunik maqisoortoqartillugu, Beredskabsstyrelsip akuutissanut tunngasunut upalungaarsimasuutitaanit siunnersorneqarsinnaasut.