Livex 2016
Upalungaarsimanermut sungiusarneq: Politiit umiarsuit aportut ornippaat
Manna tikillugu annassiniarnermik imaanilu avatangiisinik sungiusarnerit annersaat maanna aallartinneqarpoq Nuup avataani pisuusaartitsisoqarluni
Arfininngormat maajip 28-anni nalunaaqutaq 10.40 Kalaallit Nunaanni Politiit nalunaarfigineqarput Nuup avataani umiarsuit aporsimasut.
Eqqissiinnarilli, tamanna piviusuunngilaq, upalungaarsimanermulli sungiusarnersuup Livexip ilagalugu.
Akunnerni ullunilu tulliuttuni politiit oqartussaasullu peqataasut allat pisimasoq pitsaanerpaamik iliuuseqarfiginiassavaat, neriunartumik pitsaasumik qanimullu aaqqissuussaasumik suleqatigiinnikkut.
Politiinit, Illersornissaqarfimmit, Hjemmeværnimit oqartussaasunillu sungiusarnermi peqataasut, ajutoortuusaartinneqartut pilersaarusiortullu 350-t Liveximi peqataapput, sungiusarnerlu juunip 5-iata tungaanut ingerlanneqassaaq.
Sungiusarnermi peqataasorpassuit
Sungiusarneq manna tikillugu Kalaallit Nunaanni annaassiniarnermik imaanilu avatangiisinik sungiusarnerit annersaraat.
Sungiusarnerup ulluni sisamani ingerlanneqarnerani Nuummi eqqaanilu nunami imaanilu angallattoqangaatsiassaaq.
Politimester Bjørn Tegner Bay nassuiaavoq Nuummi politiit ilarpassui sapaatip akunnerata naanerani sungiusarnermi peqataassasut.
Politiit aqqusinerni
– Taama annertutigisumik sungiusarnermi politiit upalungaarsimanerannut ataatsimullu aaqqissuussaanerannut annertuumik unammilligassaassaaq naatsorsuutigisatsitut taama annertutigisumik tatineqarnissaq.
Sungiusartoqaraluartorli politiit nalinginnaasumik suliassaat ingerlanneqassapput, taanna neriorsuivoq. Assersuutigalugu aqqusinikkut angallannermi annertunerusumik ajutoortoqarpat, inummik ujaasisoqassappat imaluunniit toqutseriartoqassappat.