Itillersuaq
Upalungaarsimanermut pisortaq: Arsaattarfittut 20-sut isorartutigisoq ikuallagussaavoq
Nanortallip kujataani isorartoorujussuaq ikuallassimasoq Kommune Kujalliup upalungaarsimanermut pisortaata ilisimatitsissutigaa
Nanortallip kujataata nalaani, Tasiusap Aappilattullu akornanni Itillersuarmi nuna ikuallappoq sisamanngormalli.
Arsaattarfittut 20-sut isorartutigisoq ikuallassimasoq, qatserisartullu suli ikuallattoq qaminniarsarigaat, Kommune Kujallermi upalungaarsimanermut pisortap Peter Erik Thomsenip Sermitsiaq.AG-mut oqaatigaa.
Iluatsinngitsoortoq
- Sisamanngormalli ikuallattoq qaminniarsarilerparput. Isorartuumik ikuallannera pissutigalugu ikuallattoq qaminneqarsinnaanngimmat tallimanngormat taamaatiinnarallarpugut. Ikuallattoq siaruapallammat ikuallattup qaminneqarnissaa ajornakusoorpoq, Peter Erik Thomsen oqarpoq.
Qatserisartut aqqanillit ippassaq angerlartinneqarput, ikuallattormi annertunerusumik iliuuseqarfigisinnaanngilaat.
- Qatserisartut asimi unnuisariaqarsimapput. Qasoqqasorujussuit ippassaq angerlartinneqarput, oqarpoq.
Nammineq qaminnissaa neriuutigineqarpoq
Ikuallattoq takusarneqarsimasoq upalungaarsimanermut pisortaasup oqaatigaa. Ikuallattoq avammukaartoq oqaatigaa, kuullu tungaanukaarluni. Tassani ikuallattup qaminnissaa neriuutigineqarpoq.
Aamma ikuallattoq kangimukaartoq sioqqat tungaannukaartuusoq ilisimatitsissutigaa. Sioqqanit qaminneqarumaartoq neriuutigaa. Aqagu aamma ikuallattoq takusaqqinneqarumaartoq oqaatigaa.
Navianartoqanngilaq
Ikuallattoq inunnut uumasunullu navianartuunngitsoq Peter Erik Thomsen oqarpoq. Illoqarfimmi nunaqafinniluunniit ikuallannerata pissutigisaanik pujulissagaluarpat, innuttaasut igalaatik matussagaat siunnersuutigineqarpoq.