Nuuk

Unnuk kulturisiorfimmi suut pinnataarisinnaanerlugit takukkit

Unnummi kulturisiorfimmi unammisitsinerpassuarni peqataasut aningaasanik, atisanik filmertarfimmut billetsinik nerisassanillu eqquisinnaapput

Meeqqat titartaasinnaasut akissarsiassamik eqquisinnaapput.

Unnummi kulturisiorfimmi eqqumiitsuliorneq, nipilersorneq, paasinninnissaq misigisassallu pingaarnerpaatut sammineqartaraluartut aamma unammisitsisoqartartorujussuuvoq.

Lokkemiddel

Peqataasummi anguniagarisarpaat innuttaasut namminerminnut ornigutsinnissaat peqatigiiffitsik, Ingerlatsivitsik suliffeqarfitsilluunniit oqaloqatigiissutigalugu. Pulaartoqarumallunilu sorpassuit nuannersut pissanganartullu atorniarneqartarput. Tamakkua ilagaat unammisitsineq, minnerunngitsumillu tamakkua akissarsiassartaat.

Unammillaqqissuugaanni Unnummi kulturisiorfimmi pissarsinissamut periarfissaqarluarpoq.

Assersuutigalugu Kalaallit Nunaanni Naatsorsueqqissaartarfik unnuup kulturisiorfiup ingerlanerani pingasunik unammisitsiniarpoq. Tassa nalorsitsaarineq, meeqqat titartagaat kusanarnerpaaq aamma kukkunerit tallimat nanikkit. Akissarsiassaapput Katuami filmertarfimmut billetsit katillugit tallimat.

Aningaasat, meeqqanuinnaq

INI-mi aningaasanik akissarsiassaqarpoq. Inissiaatileqatigiiffimmi 250 koruunit akissarsiarineqarsinnaapput, tassa meeraaguit titartaallaqqillutillu. Pineqarpormi nukarlerpaanut titartaanermik unammisitsineq, INI pisussanut allattorsimaffimmi erseqqissaavoq.
Unnuup ingerlanerani politeeqarfiliaruit isilerninni nalorsitsaarummik tunineqassaatit. Ajugaasoq akissarsiassaqarpoq, taannali suunersoq politiit pisussanik allassimaffimmi oqaatigiumanngilaat

Aamma partiit pulaartuminnut nalorsitsaariniarput, Demokraatinilu aammalu IA-kunni tuluujuaqqamik eqquisoqarsinnaavoq.

Nukissiorfiit neriorsuivoq unnuk pisoqarfiulluassasoq, unammisitsisoqarluassasorlu. Tassunga takkutiinnarnikkut makitsinermut peqataasoqassaaq, eqqugassarlu erseqqinnerusumik oqaatigineqanngitsoq eqqugassaavoq. Tamanna peqatigalugu biilinik ungasiamit aquttakkanik sukkaniunnermi peqataasoqarsinnaavoq, tassanilu aamma akissarsiassaqarpoq. Kingullertullu,
minnerunngitsumilli nukissamik pilersuineq pillugu nalorsitsaarummi peqataasoqarsinnaavoq, eqqugassarlu annerpaaq pissarsiarineqarsinnaavoq, tassa koori nerisassanik 500 koruuninik nalilinnik imalik.

Arferit asanninnerlu

Pinngortitaleriffiup ileqquni malillugu ukioq mannattaaq nalorsitsaarinermini arfernik plakati eqqugassaritippaa, allat programmimi allaannarput assigiinngitsunik unammisitsiniarlutik ajugaasunullu akissarsiassaqartoq. Tamakkua assersuutigalugu tassaapput Mittarfeqarfiit, Tele-Post aamma Air Greenland.

Nuuk Kunstmuseumip aamma eqqugassat oqaatigiumanngilai, akerlianilli oqarluni unammisitsinermi asanninneq pineqassasoq.

Peqqissaanermik Ilinniarfimmi, Naalakkersuisup Naalakkersuisoqarfiani Inatsisartunilu aamma unammisitsisoqarniarpoq, eqqugassat tupaallannartuussallutik.

Ukioq manna Unnummi kulturisiorfimmi Royal Greenland pinnguartitsillunilu unammisitsiniarpoq. Tassani ilaatigut raajanik qalipaajaanermik unammisitsisoqassaaq. Qarasarissut aamma periarfissaqarput, imaasiallaannarlu ilisimasassanut pikkorissuugaanni unamminermi 13-it Eqqoriakkit iluatsitseriartoqarsinnaavoq. Pisussatut allattorsimaffik malillugu eqqugassat ilaatigut tassaapput raajat karsi, assagiarsuit karsi aalisakkallu panertut assigiinngitsut.

Nuannisarniarluni

Pinerluuteqarsimasunik inissiisarfiliaruit aamma tassani nalorsitsaarinermi peqataasoqarsinnaavoq, tassanili akissarsiassaq sumiiffinnit allanit allaanerulaarpoq. Tassa akissarsiassat inissinneqarsimasunit sananeqarsimammata.

Unammisitsinerilli ilaanni kisimiilluni nuannisarniaannarluni peqataaffissaapput, unamminerlu Umiarsuit (aamma) taamaattariaqarpoq – unnummi kulturisiorfimmi angalaneq. Taanna Nuuk Kunstmuseumimitd, Ilimmarfimmi Allagaateqarfimmit aamma Nunatta Katersugaasivianit suleqatigiilluni aaqissuunneqarsimavoq. Tassani akissarsiassaqarpoq, aammami suliniut
anguniagaqarfiummat logbogit atorlugit aqqutaanilu suliassaqarluni unnummi aliikkusersuinernut tapertaalluarsinnaasoq.

Pilersaarut tamakkiisoq Nuuk Ugeaviisimi takuuk, aviisi uani pissarsiarisinnaavat:

Powered by Labrador CMS