Unnuk kulturisiorfik

Unnuk Kulturisiorfimmi Narsami innuttaasut anorersuarmik aarlerisaarut soqutiginngilaat

Anorlikujukkaluartoq anorersuarnissamillu aarlerisaaruteqarnerup pissutigisaanik suliffeqarfiit ilaat aaqqissuussinissamik kinguartitsisimangaluartut, illoqarfimmi kulturisiortitsineq ornigarneqarluarpoq

Hos politiet var der mange især unge, der beundrede og prøvede politiets våben og udstyr.

Arlallinnik ornitassanik toqqagassaqarpoq. Narsap Katersugaasivia filmimik takutitsivoq aamma kaffillerlunilu kaagillerpoq, Henrik Lundillu illua ammatinneqarluni.

Ammatitsineq

Nukissiorfiit, oqaluffik, qatserisarfik, politeeqarfik, inuusuttut ornittagaat Qaqqavaarsuk, sanaluttarfik Muku kommunillu kiffartuussiveqarfiisa ilaat aaqqissuussinermi ammapput.

Anorlingaatsiarnera pissutigalugu qatserisarfiup silami aaqqissuussat tamaasa taamaatissimagai, politiit illoqarfimmi tungujortunik ikittaartitsilluni ingerlaaqattaarput, inuusuttulli pissagallutillu peqqisiileqisut ilaasorisaqattaarlugit.

Peqqinnissaqarfik katersortarfimmi aaqqissuussisimasoq ornigarluarneqarnersaagunarpoq, tassani orniguttut peqqinneq pillugu siunnersorneqarput, tuberkulose sukkornerlu pillugit paasisaqartinneqarput kiisalu aap naqitsinera timillu sukkoqassusaanik uuttortarneqarlutik. Saniatigut meeqqanut eqqugassartalimmik, arlaannaanilluunniit ilisimaneqanngitsumik, peqqinneq pillugu eqquiniaasitsisoqarpoq.

Taamaatinneq

Inuussutissanut ilinniarfik Inuilu, ornigarluarneqarnerpaasartoq, silapilunnissaanik aarlerisaarisoqarunnaarnissaanut, aaqqissuussinissaq kinguartissimavaat.

Unnukkulli anoraaruppoq, sakkukitsuinnarmillu anorsaanngualerluni.

Powered by Labrador CMS