københavn
Unnuk kulturisiorfimmi aliikkutassat tamanut
Kalaallit Folketingimut ilaasortat aamma Køenhavnimi Kalaallit Illuutaat aggersaapput
København Kulturnattenimi inunnik ulikkaavippoq, alakkarneqarsinnaasunullu arlalinnut utaqqisoqartariaqartarluni ilaatigut Christiansborgimut.
Nagguteerallertut
Tassanilu Siumut Inuit Ataqatigiillu ataatsimoorussipput Araba-kaffimillu nagguteeqqanillu sassalliuteqarlutik. Christiansborgimi takuniaasut Folketingimut ilaasortat Aaja Chemnitz Larsenip aamma Aleqa Hammondip ilassinissaannut periarfissaqarput.
Ulf Fleischer aamma Ida Kleist nipilersukkanik nutaaliaanerusunik qanganisaanerusunillu aliikkusersuipput. Tamatuma saniatigut Debora Kleist Allatta 2040-mit oqaluttualiaaqqanik atuffassivoq. Atuakkami tassani inuusuttut atuakkiortut qulit siunissamik takorlugaat pissanganartut annilaajummernakannersullu atuarneqarsinnaapput.
Tamatuma saniatigut Kalaallit Nunaata Danmarkillu akornanni kulturikkut naapinneq pillugu filmiliat naatsut takutinneqarput.
Aaqqissuussinerpassuit
Kulturnattenimi aaqqissuussinerit assigiinngitsut aatsaat taama amerlatigipput. Københavnimilu Kalaallit Illuutaanni paasissutissiisartoq Søren Thalund naapertorlugu Løvstrædemi illumut 2014-imut sanilliullugu alakkaasut ikinnerungaatsiarnerannut tamanna nassuiaataasinnaavoq.
Inunnik ulikkaartoq
Taamaattorli Aviaja Lumholdt Kvartet nipilersukkanik aliikkusersuimmat illu inunnik ulikkaavippoq. Mia Skifte Lyngelu kalattoornermik ilinniartitsimmat qitilluataartoqarpoq.
Tarnip qalipaatai
Eqqumiitsulianik soqutiginnittunut Gukki Nukap saqqummersitai Tarnima qalipaatai takornariartinneqarput. Gukki Nuka marriornermik ukiuni arlalissuarni suliaqarnerusimavoq, maannali digitalimik qalipakkat mobiltelefonimi programmi aaqqissuussissutaasartoq aqqutigalugu suliarineqartut aallunnerulersimallugit.
Taamaalilluni qalipaatigissaarluinnartunik suliaqartalersimavoq. Saqqummersitallu decembarip sisamaata tungaanut takuniarneqarsinnaapput.
Aamma takukkit:
Unnuk kulturisiorfimmit assilisarpasssuit
Digitalimik qalipagai torrallatat