unnerluutigineqartoq

Unnerluutigineqareernermi kingorna: Pisoq quarsaarnarpoq

Peqquserlussimasutut Fyns Politiinut unnerluussaasup Carsten Frank Hansenip pisoq paasiuminaatsippaa. Danske Andelskassers Banks Odensemi immikkoortortaqarfimmi pisortaanermini peqquserlussimasutut unnerluunneqaatigaa

- Aviisini uanga pillunga allaaserineqartut pillugit atuarlugit nuanninngeqaaq. Nalunngilarami ajortuliornikuunanga kukkusumillu suliaqarnikuunanga.

Carsten Frank Hansen Fyens Stiftstidendemit marlunngormat apersorneqartilluni oqarpoq.c

Aviisi Berlingske Businessip marlunngornermi allaaseraa Carsten Frank Hansen peqquserlussimasutut unnerluunneqartoq. Danske Andelskassers Banks Odensemi immikkoortortaqarfimmi pisortaanermini peqquserlussimasutut unnerluunneqaatigaa.

Carsten Frank Hansen: Peqquserlunngilanga
Carsten Frank Hansen eqqartuunneqassaguni parnaarussaassaaq qaammatini arlaqanngitsuni.

- Taamaasiortoqarnera quarsaarnarpoq paasisassaananilu. Unnerluussummi amerlasuunik allaqqasoqarpoq, amerlasuut paasisinnaanngilakka, itinerusumilli oqaaseqarfigissagukkit eqqartuussissusisora oqaluuteqqaartariaqarpara. Una suliaq marloqiusaavoq, ataasiinnarlu tusaaneqarnikuuvoq. Eqqartuussivimmi uanga uunga qanoq oqaasissaqarnerlunga saqqummiukkumaarpara, Carsten Frank Hansen Fyens Stiftstidendemut oqarpoq. Pinngitsuunersoq aamma aperineqarpoq, tassungalu ima akivoq:

- Arlaata salloqittarpaanga, taamaattumik paasitinniarsarissavara akerlera eqqunngitsumik oqaluttoq, kina akerlerinerlugu oqaaseqarusunngitsoq oqarpoq.

Unnerluummi ilaatigut allaqqavoq Carsten Frank Hansen 335.000 koruuninik Amagerbankimut nuussisimasoq piginneqatigiiffimmut Y-mut. Aqaguani nammineq kontoanut aningaasat ilineqarput, aningaasaateqarfillu Danske Andelskassers Bank 335.000 koruuninik annaasaqarluni, Berlingske allappoq.

Peqquserlussimasutut taamaasilluni unnerluunneqarpoq. Eqqunngitsumik piginneqatigiiffimmut atukkiisoqarsimasoq Politiinit nalunaarutigineqarpoq.

Unnerluussut pillugu Berlingske Businessip unnerluunneqartoq Carsten Frank Hansen attaveqarfigaa, inuttaatali unnerluussineq oqaaseqarfiginiarnagu oqaatigaa.

Sermitsiaq.AG arlaleriarluni Carsten Frank Hansenimut apersuerusulluni saaffiginnittaraluarpoq kinguneqanngitsumik.

Powered by Labrador CMS