peqqarniisaarnerup kingorna
Unnerluussisoq: Parisimi peqqarniisaarniat saassussinerannik aaqqissuisoq toquvoq
Parisimi illoqarfiup immikkoortuani Saint-Denisimi politiit inissiami pakasaaneranni, Abdelhamid Abaaoud toqutaavoq
Parisimi sapaatip-akunnerata siuliani saassussisoqarneranik aaqqissuisuusimasutut pasineqartoq Abdelhamid Abaaoud, politiit Parisip ilaani Saint Denisimi pakasaallutik ippassaq misissuineranni toqutaasunut ilaavoq, unnerluussisussaatitaasoq taama ilisimatitsivoq.
Politiit inissiamut toqqoqqaffigisaannut iserneranni toqutaasoq, politiit nalunaarutigaat.
- Abdelhamid Abaaoud toqutaasutut pisortatigoortumik nalunaarutigineqarpoq, inuaasa ipaasaat aallaavigalugu kinaassusersineqarsinnaasimagami, unnerluussisussaatitaanerup nalunaarutaani tamanna atuarneqarsinnaavoq.
Islamisiortut ingasaassiniat Parisimi tallimanngormat unnukkut saassussimmata inuit 129-t toqutaapput, isikkamik arsaattarfik Stade de France, imerniartarfiit neriniartarfiillu assigiinngitsut Parisip qiterpasissuaniittut saassunneqarmata, soorlu aamma tusarnaartitsisarfik Bataclan saassunneqartoq.
Frankrigimi politiit aallaqqaammut isumaqaraluarput Abdelhamid Abaaoud Islamisk Stat peqatigalugit suli Syriamiittoq. Politiilli misissuineranni Parisip ilaanut St.Denisimut taava pivoq, inissiarlu politiit pakasaallutik iserfigaat, akunnialunnguanilu sakkuaattoqarluni.
Arnaq, islamisiortut allat arfiniliugunartut peqatigalugit inissiamiittoq imminut pilliutigaluni qaartippoq. Arnaq taanna toquvoq allallu aniguillutik.