Unnerluunneqartoq Carsten F. Hansen: Pinngitsuuvunga

Danskit aviisiat Berlingske Business allappoq, Carsten Frank Hansen Danmarkimi politiinit peqquserlussimasutut unnerluunneqartoq. Eqqartuunneqaruni parnaarunneqarsinnaavoq. Qaammatini arlaqanngitsuni parnaarussaasinnaasoq unnerluussisup oqaatigaa.

Eqqartuussinerlu Odensemi aqagu pingasunngorpat ingerlanneqassaaq.

Danske Andelskassers Banks fynske filial Odensemi Carsten Frank Hansenip inuussutissarsiornermut tunngasunik siunersuisarfimmi pisortatut atorfeqarsimanini unnerluunneqaatigaa, piginneqatigiiffiup X-ip 1,9 million koruuninik aningaasanik atornissamut qinnuteqaataanut akuersisimanera unnerluunneqarpoq.

335.000 koruuninik taarsiinissaq
Unnerluummi ilaatigut allaqqavoq Carsten Frank Hansen 335.000 koruuninik Amagerbankimut nuussisimasoq piginneqatigiiffimmut Y-mut. Aqaguani nammineq kontoanut aningaasat ilineqarput, aningaasaateqarfillu Danske Andelskassers Bank 335.000 koruuninik annaasaqarluni, Berlingske allappoq.

Peqquserlussimasutut taamaasilluni unnerluunneqarpoq. Eqqunngitsumik piginneqatigiiffimmut atukkiisoqarsimasoq Politiinit nalunaarutigineqarpoq.

Carsten Frank Hansen aviisimut Fyens Stifttidendemut 2013-mi oqarpoq pisumut malugusulluni, Aningaasaqarnermut Nunamullu Namminermut Naalakkersuisoqarfimmi ulluni suliffiusuni marlunni sulereerluni soraaginnartariaqarsimavoq, Fynimi politiit unnerluussinerat pissutaalluni.

Paasisinnaanngilaa
Carsten Frank Hansen Fyens Stiftstidendemit apersorneqartilluni oqarpoq unnerluunneqarnini paasisinnaanagu.

- Taamaasiortoqarnera quarsaarnarpoq paasisassaananilu. Unnerluussummi amerlasuunik allaqqasoqarpoq, amerlasuut paasisinnaanngilakka, itinerusumilli oqaaseqarfigissagukkit eqqartuussissusisora oqaluuteqqaartariaqarpara. Una suliaq marloqiusaavoq, ataasiinnarlu tusaaneqarnikuuvoq. Eqqartuussivimmi uanga uunga qanoq oqaasissaqarnerlunga saqqummiukkumaarpara, Carsten Frank Hansen Fyens Stiftstidendemut oqarpoq.

Pinngitsuutinneqarnissani naatsorsuutigaa
Pinngitsuunersoq aamma aperineqarpoq, tassungalu ima akivoq:

- Arlaata salloqittarpaanga, taamaattumik paasitinniarsarissavara akerlera eqqunngitsumik oqaluttoq, kina akerlerinerlugu oqaaseqarusunngitsoq oqarpoq.

Sermitsiaq.AG arlaleriarluni Carsten Frank Hansenimut apersuerusulluni saaffiginnittaraluarpoq kinguneqanngitsumik. Unnerluussinermi Sermitsiaq.AG malinnaatitaqassaaq, nalunaaqutarlu 09.00 aallartissalluni